Emva kokufa kukayise nowumuntu owayemcathulisa isigubhukane ngo-2021, ipulazi likaNks Mmadipilo Letlape layeka ukuba yibhizinisi lezolimo elenza inzuzo, laphenduka umhlaba nje oduvile. Kwakunzima ukumelana nokufelwa nguyise, umlimi uPhillip, okunguye okwase kuneminyaka ephethe epulazini. Kodwa-ke imvamisa, yingezikhathi ezinzima lapho kuvela khona amandla omuntu.
“Ngangifuna ukuyeka ezolimo ngiyidayise nemfuyo. Ngangingakwazi ukwamukela ukufa komuntu okuwuyena owayengigqugquzela kakhulu futhi engicathulisa. Ukufa kukaBaba wami kwashiya isikhala esikhulu empilweni yami kangangokuthi kwaphela amasonto ngingakwazi ukuya epulazini.”
Mnikazi weDipilo Group Farming
Ngokuhamba kwesikhathi lo mlimi waseNorth West ugcine evukile wazithatha. Namhlanje njengomnikazi weDipilo Group Farming, uNks Letlape akagcinanga nje ngokushintsha izinto epulazini, kodwa uqhubeka lapho kugcine khona uyise ukufukula abalimi abasafufusa.
Noma yinini uma ufika epulazini likaNks Letlape elingamahekthare awu-450 uzithela emhlambini wezinkomo. Amakhasimende akhe ngabantu bendawo abathenga izinkomo ngoba benemingcwabo, imishado neminye imicimbi. Uphinde azidayise nasendalini eRustenburg.
Indlela anqoba ngayo ubaba wakhe
UNks Letlape ukhule nabalimi futhi uyakhumbula ukuthi uthando lwakhe lwezolimo lwaqala eneminyaka ewu-12.
Nakuba waqale wangavunyelwa ukusebenza epulazini kodwa ukuphelezela uyise nomzala bakhe uma beya khona kwakwanele ukumkhuthaza. Ngesikhathi besebenza wayesuke ezihlalele phansi kwesihlahla.
Ngo-2016, uNks Letlape uqunge isibindi, watshela uyise ukuthi usekulungele ukusebenza epulazini. Nokho impendulo kayise yamumangaza.
Uyise wayengakholwa ukuthi uyayiqonda kahle lento ayicelayo ingasaphathwa eyokuthi akazi lutho ngezolimo. Wanquma ukumphonsela inselelo.
“Langalimbe wangibizela esibayeni wathi angikhombe ithole, ngakwenza lokho. Yilapho angikholwa khona, nokho wathi angibe yimenenja yakhe. Ngamtshela ukuthi ngifuna ukuba wumlimi hhayi imenenja.”
Wagcina evumile uyise base beyavumelana. Esikhundleni sokumholela ngokusebenza, bavumelana ngokuthi uzomnika amankonyane amabili njalo ngonyaka.
“Ngaqale ngangayizwisisa kahle lento ayeyisho kodwa ngangingafuni ukuholelwa, ngangifisa nje ukuba yingxenye yebhizinisi lento engiyithandayo,” usho kanje.
Amandla okucathuliswa
Ngenxa kayise ongasekho, uNks Letlape uyakwazi ukubaluleka kokuba nomuntu okucathulisayo. Yingakho enye yezindlela akhumbula ngazo uBaba wakhe kuwukufukula abalimi abasafufusa bakhulise amabhizinisi abo.
Njengomsunguli wemakethe nekhempu yabalimi ebanjwa kabili onyakeni, uNks Letlape uhlanganisa abalimi baseNorth West ukuze bacobelelane ngolwazi.
Inhloso yomcimbi wukuthola nokusiza abalimi abancane esifundazweni bakhule, bazi abantu futhi bacobelelane ngolwazi nangamathuba.
“Inhloso wukusebenzisa ikhempu njengenye yezindlela zokufundisa abalimi ukuthi bacijane bebodwa. Sizama nokusiza abalimi bakhiqize inyama yenkomo esezingeni ukuze benze inzuzo.”
Ikhempu igxila nasekukhiqizeni izitshalo
“Kufanele uthando lukugqugquzele futhi kufanele ufune nokufunda kwabanye abantu uma uqala loluhambo lwezolimo.”
Ukuphokophela yize kunezinselelo
Uhambo lwakhe belunezinselelo kodwa uNks Letlape ubambelele, waphokophela. Kudlangile ukwebiwa kwemfuyo esigodini sangakubo.
“Kukhona isikhathi lapho izinkomo zami zake zanyamalala khona izinsuku ezimbili nokwangixaka ngoba aziyi emadlelweni zingabuyi. Kodwa-ke sakwazi ukuzithola. Sathola ukuthi kunabantu ababezama ukuzintshontsha ngokuzidukisa.”
Enye into ehlupha uNks Letlape wukuthi yimboni lena esagcwele amadoda nathi “imvamisa awathandi ukutshelwa noma ukwelulekwa ngumuntu wesifazane omncane”.
“Kunalokho yibona abafuna ukukutshela ukuthi wenzenjani. Babukeka bengafuni ukuboniswa owesifazane.”
Yize zikhona lezi zinselelo futhi kukhona nokuthi akanaso isicucu sezolimo ngaphandle kwesitifiketi sokukhiqiza ayexhaswe wuhulumeni esifundela, uNks Letlape ukholwa wukuthi kuningi akwaziyo nangasiza ngakho.
UNks Letlape ufisa ukubona sanda isibalo sentsha engena kwezolimo. Nokho ukhipha lesi sexwayiso.
“Abantu abasha abangezi kwezolimo becabanga ukuthi uyalima namhlanje bese uthola imali kusasa. Uyatshala isikhathi eside, kudingeka isineke.”
Nakuba kuzothatha isikhathi ngaphambi kokuthi kuphole amanxeba okufa kukayise, uzimisele futhi unamaphupho amakhulu okukhulisa ibhizinisi amshiyela lona.
Nakuba eyithanda imfuyo kodwa uNks Letlape uzimisele nangokwengeza ngokwenza neminye imikhiqizo yezolimo nangokulima izitshalo, into okufanele yenzeke maduzane.
FUNDA FUTHI: Kumsizile ukuthatha amashansi umlimi waseNW.
Thola izindaba Ngabaletha Ushintsho: Izindaba ezikhuthazanayo ngabondla abantu baseMzansi.
