UNksz Lungile Shelembe, onezingadi eXobho, KwaZulu-Natali, uyazifela ngokulima ngendlela engayoni imvelo. Waqala ukutshala ngo-2018 ngoba eswele umsebenzi. Nokho, wayengalindele ukuthi lolu thando luzomholela ekutheni engamele izingadi eziwu-240 eXobho nasezindaweni eyakhelene nazo.
UNks Shelembe uthe waqala ngokutshala u-beetroot, iklabishi nespinashi ukugwema ukuthenga yonke into esitolo. Lwaqala kanjalo uthando.
Ugqugquzelwe ukubona umsebenzi wakhe ukhula. IXobho yindawo eyaziwa ngezimboni zikashukela namahlathi. Lapho iXobho ikhona eKZN ziyachuma ezolimo.
Ngaphambi kokuba ngumlimi, uNksz Shelembe wayedayisela omakhelwane, abantu abasemigwaqweni nanezingane zesikole amagwinya nama-chips.
Waqala efuna ukuziphilisa
“Ngesikhathi ngiqala ukulima, ngangenzela ukuziphilisa. Ukuqeqesha abantu nomsebenzi ngangingakulindele.”
UNksz Shelembe waba nenhlanhla yokuqeqeshwa ngokuphatha ibhizinisi nanezokuxhumana yinhlangano iWozamoya. Wanikwa leli thuba ngoba kubonakala indlela azikhandla ngayo.
“Ngisho kunezinkinga zemali futhi amazinga okuntula imisebenzi ephezulu, ungawasebenzisa amakhono onawo ukuxosha ikati eziko ukuze ungalali ungadlile.”
Usizwe umhlaba wasendaweni
UNksz Shelembe utshele iFood for Mzansi ukuthi wayengenayo indawo eyenele ekhaya emva kokudayisa esinye isivuno sakhe. Bayinqwaba abantu abafika befuna ukuthenga, kwadingeka aqhamuke necebo. Wabheka enye indawo angatshala kuyo, wangqongqoza esikoleni samabanga aphansi iCekazi esise-Emashekeni, eXobho.
“Ngitshale emhlabeni oyihekthare elilodwa esikoleni, ngiyihlukanise yaba yizingadi ezincane eziwu-15. Ngitshale iklabishi, u-lettuce, ispinashi, i-kale, o-pepper abaluhlaza, u-anyanisi, i-cauliflower, u-brinjal, u-peas no-beetroot.”
Ngo-2021, wathola umsebenzi wokuba ngumxhumanisi. Umsebenzi wakhe uthinta ukufaka amanethi ezingadini nanokugxila ekutshaleni ngezindlela ezingawasebenzisi amakhemikhali.
“Amakhasimende ami ngothisha basezikoleni iCekazi Primary ne-Imavangana Senior Secondary kanjalo namalungu omphakathi. Ngabe angikho lapho ngikhona ngaphandle kwabo.”
Injongo yakhe
Omunye umsebenzi wakhe njengomxhumanisi wukufundisa umphakathi ukuthi ukwazi ukuziqalela izingadi zawo. Kade ebafundisa ukuzihlanganisela umanyolo nanezindlela zokushintsha izitshalo.
“IWozamoya isiza umphakathi ngokusabalalisa izimbewu namathangi amanzi. Imizamo yabo iyasiza kakhulu ukwenza izinto zibe lula.”
Uphinde anakekele izingadi zomphakathi eziyisithupha, abhekelele izingadi eziwu-240 eXobho futhi uqeqesha imindeni nabesifazane ukuze bakwazi ukuziqalela izingadi zabo futhi balime beyimifelandawonye.
Injongo yakhe enkulu wukuqhubeka nalo msebenzi wakhe omangalisayo nanokukhuthaza abantu ukuthi badle ukudla okunempilo ikakhulukazi emphakathini lapho kuphezulu ukuntuleka kwemisebenzi.
“Isifiso sami esikhulu wukuba nomhlaba wami engingasungula kuwo isikole sezolimo.”
Uthi ukuqeqeshwa kumsizile wakwazi ukufeza izinto ezinkulu asezenzile nalabo asebenza nabo.
Ukushintshanisa izitshalo
“Abanye emphakathini babekhathazekile ngokutshala izitshalo ezithile ebusika ngenxa yemvula enamandla, abanye babekhathazekile ngokulima ehlobo ngenxa yelanga elikhipha umkhovu etsheni. Ngethula uhlelo lokuthi sishintshe izitshalo futhi abantu bawamukela kahle lowo mbono.”
Ngokusho kukaNksz Shelembe, ezolimo ezindaweni zasemakhaya zihamba kahle. Nokho, inselelo ebhekene nabalimi baseXobho ukushoda kwamanzi.
“Ukube besinamadamu, mhlawumbe besizochuma ngaphandle kokukhathazeka ngezinselelo zamanzi.”
Ukholwa ukuthi ukuthembela ezinhlanganweni nakubaxhasi akusizi ngoba imishini idinga ukunakekelwa.
UNksz Shelembe uqale enzela ukuzithuthukisa yena, manje usekwenzela umphakathi. Ubani owaziyo ukuthi yini elandelayo azoyenza?
FUNDA FUTHI: Yini okufanele uyiqaphele uma uhlanganisa imikhiqizo yobisi lwezinkomo
Thola izindaba zoshintsho: Izindaba ezigqugquzelayo ngabantu abondla uMzansi.
