Ngonyaka u-2020, uMnuz Bakang Mohotlheng waseKaalpan, eNorth West, uMohotlheng uqale ukuba umlimi elandela ezinyathelweni ziyayisemkhulu, uMnuz Elias Moeketsi Mohotlheng. Ungumsunguli weBaki Bee Farm.
UMohotlheng uneDiploma in Agriculture Irrigation, ayithole eTaung Agricultural College ngo2021. Ibhizinisi lakhe uliqale ngo2020 ngesikhathi eyithwasa ngaphansi kweso likaMnuz Matlapele Morule, eBakang Farm eMahikeng.
Ufunde kabanzi ngokukhiqiza amaveji, ukunisela nokubaluleka kokuphatha ipulazi ngendlela efanele ngaphansi kweso likaMorule.
“Sengiyaqonda ukuthi kungani sathunyelwa kubalimi ukuze siyofunda ukuthi umsebenzi wenziwa kanjani bukhoma, lapho ufunda lokhu obukufunda encwadini,” kusho yena.
Sebenzisa kahle ikhono nesikhathi
UMohotlheng usungule ibhizinisi lokufuya izinyosi futhi unebhizinisi lezinkukhu nezingulube . Uzimisele ukwenza konke okusemandleni ukuze aphumelele ngalezi zinsiza nesikhathi anaso.
Uthe akufundile ngokuqala ibhizinisi ukuthi kubalulekile ukuthi ungagxili ekukhiqizeni umkhiqizo owodwa epulazini lakho ukuze kuhlale kunemali engenayo.
Kuntshontshiwe epulazini lakhe ngoFebhuwari emva kokuthi kucekelwe izimpahla phansi. Lokhu kwenze wabona ukuthi kubalulekile ukuba nezokuphepha nanophawu nokuthi imfuyo ibe nophawu ukuze itholakale kalula uma intshontshiwe.
“Sengiqale nezinhlelo zokuthi ngisebenzise izinyosi ukuze zisabalalise impova kujikanelanga. Esikhundleni sokuthi ngibenzise umanyolo ukuze uthole umkhiqizo othe xaxa ngisebenzisa izinyosi emasimini kajikanelanga. Lokho kusiza nasekutheni zisheshe ukukhiqiza uju,” echaza
Qinisekisa imfuyo ihleli kahle
Akukho okubaluleke ukudlula ukuba nomhlahlandlela wokusebenza uma ungumlimi ofuyile. Uthe uba nezingulube ezingu-17 nezinkukhu ezingu-200 uma zingazele.
Usitshele ngezinto ezimqoka okumele uzazi uma ufuye lolu hlobo lwezilwane.
Uthe uma ihhoko lezinkukhu lilincane, izinkukhu zimpintshene, zikhula zingalingani okwenza kube nzima ukuzidayisa. Uphakamise ukuthi ihhoko lakhiwe liphakame ukuze kubelula ukuthi abasebenzi bahambe kahle kulo.
“Amagoqo ezingulube kumele akhiwe ngendlela ezokwenza ukuthi izingulube zikwazi ukukhula nokuthi zikwazi ukukhiqiza. Ngaphakathi kwegoqo kumele kube nezinga lokushisa elingabandi kakhulu futhi elingashisi kakhulu, kungene umoya, kube namanzi nendlela yokulawula umquba wazo izingulube” kusho yena.
Gwema ukusebenzisa izindlela ezisheshayo uma uphakela izingulube
“Esinye iseluleko enginaso esokuthi, gwema ukuphakela izingulube endaweni engcolile. Gwema ukuphakela izingulube ukudla okusale ezitolo osekulahliwe noma ngabe ukudla kwezingulube kuyabiza. Okunye ukudla okungakhelwanga ukudliwa izingulube kungazigulisa ikakhulukazi lokhu okusuke kulahlwa izitolo,” usho kanje.
Uphakamise ukuthi abafuyi basebenzise ukudla kwezingulube okwakhelwe zona ukuze ziithole umscoco ofanele kukho bese zikhula ngendlela futhi zibe nempilo.
“Uma sekudlule isikhathi sokuncelisa, siyaqala ukufundisa amachwane ukudla. Ngalesi sikhathi siyaqaphela ukuthi siwaphakela isikali esenele sokudla. Ngokujwayelekile ingulube kumele idle u2.5kg ngosuku kodwa ngenxa yokukhula kwezindleko zokudla sihlanganisa isaka elilodwa lezingulube ezisakhula namasaka amabili ombila ogayiwe senze ukudla kwamachwane okuzohlala amasonto amathathu kuya kwamane.”
Uqhube wathi izingulube uzikala isisindo njalo, ukuze abone ukukhula kwazo nokuthi isisindo sazo siyehla noma siyenyuka yini kusukela zizelwe. Uhlala eqaphile ukukhula kwazo ukuze akhiqize izingulube ezikhipha inyama enefutha anempilo ekhule kahle.
Uma izingulube zinikezwa ukudla okungenele kungaphazamisa ukukhula kwazo, kube lula nokuthola izifo.
“Enye yezinkinga esihlangabezana nazo singabafuyi bezinkukhu ukucishwa kukagesi, ikakhulukazi ebusuku lapho singakwazi ukulawula izinga lokushisa emahhokweni.”
Yazi imakethe yakho
UMohotlheng udayisela abantu abajwayelekile esebenzisa izinkundla zezokuxhumana, ikakhulukazi abasebenzi bakahulumeni, aqondanise izinsuku zakhe zokudayisa nezinsuku zokuhola kwabo
“Ngidayisela oshisanyama bakwaBuddies e0Itsoseng namadela ahlinza izinkukhu akwaBenade eBhurimansdrift.”
Lo mlimi ufisa ukuqeqesha abalimi abafisa ukufuya izinyosi okuwumkhakha awuqale sakudlala.
“Ngike ngakucabanga ukuqashisa ngezidleke zezinyosi kwabanye abalimi abafuna ukuzebenzisa izinyosi ukuze zisabalalise impova ezitshalweni eziqhakaza izimbali nokudayisa uju ezitolo,” echaza ngekusasa.
UMohotlheng angaba muncane kodwa imibono yakhe yebhizinisi izomsiza ekutheni ibhizinisi lakhe lithele izithelo ezinhle.
OKUNYE ONGAKUFUNDA: Abalimi abasebancane bejabulela ukondla uMzansi
Thola izindaba eziletha ushintsho: Izindaba ezigqugquzelayo ngabantu abondla uMzansi
