Selokhu kwathi nhlo, uNks Babe Sophie Masuge, umsunguli weBSMS Chili House, uyakuthanda ukupheka. Uze wasukumela ibhizinisi lakhe emva kokuthuswa yindlela izinto ezenzeka ngayo ngesikhathi seCOVID-19.
UNks Masuge odabuka eRustenburg, eNorth West, uyazifela ngebhodwe. Waqala ibhizinisi lokupheka ngo-2006 ephekela imishado neminye imicimbi emikhulu ayeyithola ngamathenda.
“Ngiyakuthanda ukupheka ngaso sonke isikhathi kodwa nganginalento yokuthi ngifisa ukuqala ibhizinisi lezinto ezibabayo.”
Uthi ngo-2020 kwashintsha indlela abuka ngayo izinto mayelana nokuphatha ibhizinisi lakhe. Wayeqashiwe kwenye indawo ngokugcwele kanti ibhizinisi wayelenza eceleni kodwa yamthusa indlela izinto ezenzeka ngayo ngesikhathi kuhlasele iCOVID-19, wabhekisisa izinto ebhizinisini lakhe.
“Ngesikhathi sisekhathini lapho izwe lalivalwe khona, yilapho engathi khona akengiphushe lento engifisa ukuyenza. Kunenqwaba yamabhizinisi asungulwa ngo-2020 ngoba yize kwakuwunyaka omubi, mhlawumbe kwakuyisikhathi sokuthi abantu bahlale phansi bacabange. Siphila emhlabeni osheshayo lapho sihlezi sinezinto esizicabangayo futhi imvamisa sibuye sizibeke eceleni.”
Ngaphambi kuka-2020 uNks Masuge uyavuma ukuthi “wayezijahela inzuzo” nje kuphela, efuna umsebenzi olandelayo angawuthola kodwa engakunakile kangako ukukhulisa umsebenzi.
“Ngangiziphekela, ngizifakela amathenda. Babengikhokhela kuphinde futhi ngiqhubeke kanjalo. Uma unake inzuzo kuphela kusho ukuthi awusoze waba nebhizinisi. Uyohlezi nje wenza lokho kodwa ngeke ube nebhizinisi elisimeme. Kodwa manje ngizwa ukuthi sekufike isikhathi sokuthi ngenze lokhu engangikade ngikufisa futhi ngizakhele igama.”
Uhambo lokukhiqiza i-chilli sauce
UNks Masuge wacela iSmall Enterprise Development Agency (iSEDA) imsize akhulise ibhizinisi lakhe. Ngesikhathi eqala ukwenza i-chilli sauce yakhe, wayeyidayisela abangani nomndeni wakhe.
“Kuthe uma sekuqala izwe livulwa kancane, nganginikeza abangani bami, umndeni wami nezihlobo ukuthi ziwuzame futhi wonke umuntu wayebabaza ubumnandi bayo. Ngabe sengiya e-SEDA ngabachazela ukuthi ngifisa ukwenzani nokuthi igama nakho konke okunye senginakho.”
UNks Masuge wahambisa umkhiqizo wakhe wayohlolwa ukuqinisekisa ukuthi uphephile ukuthi abantu bawudle futhi uthole nezitifiketi ezifanele eziwubufakazi balokhu.
“Sayihambisa e-SABS ukuze bayihlole, manje isinombiko ohlaziya kahle konke enakho, umsoco nokunye okukuyo. Uma uphendula ibhodlela uma uyithenga, uyawubona umbiko lapho. Ikukhombisa ukuthi ine-sodium engakanani nokunye odinga ukukwazi ngombiko. Ingahlala emashalofini unyaka wonke.”
I-BSMS Chili House yenza i-harissa chilli paste, i-chilli garlic oil, i-hot pineapple chilli sauce ne-chilli salt. I-SEDA imsizile ahlanganise uhlaka lwebhizinisi lakhe angakwazi ukulikhombisa labo okungenzeka bamxhase ngemali.
Yize egxile ekukhuliseni igama lenkampani okwamanje, uNks Masuge uthi ukuthola imali ezomxhasa nokufinyelela emakhasimendeni yizona zinselelo ezimbili nezinkulu abhekene nazo.
Ukungabi nengqalasizinda kuyamvimba afinyelele emakhasimendeni
Okwamanje ikomkhulu le-BSMS Chili House lisekhisini likaNks Masuge.
“Inselelo esinayo wukungakwazi ukufinyelela emakhasimendeni ngoba asinayo indawo ehambisana nemigomo yezempilo ezweni lethu. Ukukunikeza isibonelo, uma uya ePick n Pay bazokubuza ukuthi ‘Unayo indawo ehambisana neHACCP?’”
“Uma ungenayo indawo ehambisana nezinga le-HACCP, abakwazi ukukusiza. Ngikhuluma ngefemi noma ibhilidi elihambisana naleyo mithetho.”
UNks Masuge uthe ukuswela kwakhe indawo enkulu kunqinda nesikali akwazi ukusikhiqiza ikakhulukazi njengoba engenayo imishini emikhulu. Isibonelo nje, umshini agaya ngawo ukwazi ukukhiqiza u-1.5 litres ngosuku, okusho ukuthi ukwenza amabhodlela awu-100 kumthatha inyanga yonke.
“Ngesonto lokuqala enyangeni ngenza mhlawumbe i-harissa paste. Ngesonto elilandelayo ngenze i-hot pineapple chilli sauce. Elilandela lelo, ngenze i-chilli garlic sauce. Umshini wami awudalelwe ukusetshenziswa wumuntu okhiqizela ukudayisa ngakho uma ungitshela ukuthi usukhathele, kufanele ngiwulalele, ngiwuphumuze.”
Ukuswela indawo yokusebenzela nokungakwazi ukufinyelela emakhasimendeni yikona okwenza uNks Masuge alujabulele usizo aluthole kwiSEDA.
“Into enhle wukuthi iSEDA imile name. Bangisizile kakhulu.”
Iseluleko angasinika abanamabhizinisi ezolimo
UNks Masuge uthi into enkulu emgqugquzelayo wukufuna ukuzakhela igama, into athi wayengayiqondi kahle ngesikhathi eqala ukuba nebhizinisi lokupheka.
“Sengiyaliqonda ibhizinisi kangcono kunakuqala. Kunezinto eziningi manje engangingazicabangi ngesikhathi nginebhizinisi lokupheka futhi manje kuyangikhuthaza lokhu engikwenzayo. Ngikhuthazwa yigama lenkampani engiyakhayo nomlando engifisa ukuwushiya.”
Legacy, she says, is not just something she is building for her family. She wants to contribute to the economic legacies of black women in the country, Uthi umlando afisa ukuwushiya akenzeli nje umndeni wakhe kodwa ufisa nokufaka isandla nasemlandweni wabesifazane abamnyama emnothweni.
“Ngiyababona abantu bakithi. Siyasebenza kodwa ngazuthi sinebhakede elivuzayo. Uyawafaka amanzi kulelo bhakede kodwa aligcwali ngoba amanzi aphinde aphume. Ngicabanga ukuthi kufanele thinga bantu besifazane abamnyama siqinisekise ukuthi ibhakede esiliphethe alivuzi futhi silibone ligcwala lichichima.”
Iseluleko uMasuge asinika abangosomabhizinisi kwezolimo:
Zinike isikhathi
Imvamisa abantu basebenzisa igama elithi “siyaphanta”. Kodwa uma wenza izinto futhi ungazenzi ngendlela efanele, akukho okutheni ozokuzuza. Ngakho kufanele sizinike isikhathi.
Yenza izinto ngendlela efanele
Kufanele silandele indlela efanele. Sengike ngabona abantu emibukisweni benza izinto ezinhle kodwa bengayilandeli imithetho nemigomo yezwe. Kubalulekile ukwazi indlela efanele okufanele siyilandele.
Ungajahi nje inzuzo
Ungajahi nje inzuzo ngoba uzocabanga ukuthi usuphumelele kanti akunjalo. Njalo uma leyo nzuzo isiphelile, kufanele uphindele emuva. Kodwa uma uyithanda into oyenzayo, kukhona lento evukayo. Kusho ukuthi kunento okufanele uyenze, kusho ukuthi uzoyikhangisa inkampani yakho. Emva kwalokho uzobe usuwenza inzuzo.
FUNDA FUTHI: Agripreneur 101: Okuhle ngokusungula inkampani ye-juice
Thola izindaba ngabaletha ushintsho: Izindaba ezigqugquzelanayo ngabantu abondla uMzansi.
