Ukuphela kabuhlungu komshado wakhe ngo-2019, kwashiya umama ozikhulisela abantwana yedwa uNksz Lindiwe Magubane ekhathazekile futhi engenaso isiqiniseko sokuthi aqhubeke kanjani. Isikhumba sakhe siqubukile futhi waba namabala amnyama. Ngo-2021 unqume ukuyisukumela inkinga yakhe kanti usenebhizinisi elivelele lezimonyo aziqhenyayo ngalo emva kobunzima adlule kubo.
UNksz Magubane beyingekho into angayenza ngaphandle kokuzihlanganisela imikhiqizo yesikhumba esebenzisa izithako zemvelo ezingenawo amakhemikhali futhi eshibhile ngoba engawutholi ezitolo umkhiqizo ongaxazulula izinkinga zakhe.
Uqale kanjani?
Ngokusho kukaNksz Magubane,umzimba wakhe wezwela kakhulu ngesikhathi ehlukanisa. “Ukuhlukanisa kwangithusa kakhulu. Ngangingakulindele futhi ubuso bami buqale ukuba nezininga ngemuva kokuhlukanisa,” kuchaza yena
Waqala ukuba nazo zonke izinhlobo zezinkinga zesikhumba ayengakaze abe nazo ngaphambili, njengezinduna ezishiya amabala amnyama ebusweni bakhe. “Into engingazange ngibe nayo nasebusheni bami,” usho kanje.
Uqhube wathi ukubhekana nengcindezi yokuhlukanisa nokuba ngumama osemncane kwabhebhezela isimo.
Ukuthola amakhasimende omkhiqizo ongenawo amakhemikhali
Ngokuhamba kwesikhathi wathatha isinqumo sokuthi sekwanele, udinga umkhiqizo ozolungisa isikhumba sakhe. “Ngazama ukubheka ezitolo engingathola khona imikhiqizo engeke ingenze ngibe mpofu. Siyazi ukuthi imikhiqizo eminingi yokugcoba isikhumba ekhona inezithako ezenza isikhumba sishintshe sibe mpofu. Mina bengifuna umkhiqizo ongenawo amakhemikhali.”
Wazama ukusebenzisa imikhiqizo eyehlukene eyayitholakala ezitolo kodwa wathola ukuthi akukho nowodwa kule mikhiqizo omsiza ngezinduna noma amabala amnyama. Wakhathazeka, kwadingeka athathe isinqumo.
Ukhethe ukuqala kabusha
“Ngelinye ilanga ngavele nganquma ukuzizamela ukuzihlanganisela into engizoyigcoba ngibone ukuthi ngeke yini isebenze.”
Waqala ukwenza ucwaningo futhi wafinyelela esiphethweni sokuthi ukotapheya uyasiza. Esezamile isikhashana ngo-2021, uNksz Magubane wengeza izithako zakhe nge-shea butter. Wathola abalimi baseGhana abatshala lolu hlobo lwamafutha avame ukusetshenziswa emikhiqizweni eyenza isikhumba sibe sihle.
Waqala ukusebenzisa umkhiqizo wakhe wesikhumba kwaba ukunyamalala kwamabala amnyama esikhunjeni sakhe. UNksz Magubane udayisa insipho yase-Afrika emnyama, ishea butter, i-avocado butter, amafutha kakotapeya, insipho kakotapeya nezinto zokugcoba ezenziwe ngokotapeya. Okwenza le mikhiqizo ukuthi yenziwe lapha eNingizimu Afrika, ayibizi kakhulu kanti yenziwe ngemikhiqizo yemvelo.
“Ukotapeya yisithako esikhulu esisisebenzisayo ngoba sizama ukuthi umkhiqizo wethu ube ngowemvelo ngokuphelele. Uma sikhiqiza siyawushintsha ukuze ugcobeke bese sifaka amafutha emvelo adingakalayo,” kusho yena.
Imali aqala ngayo
UNksz Magubane waqala ngo-R15 000. “Okokuqala, ngiyajabula ukuthi ngakwazi ukugcina amakhasimende ami, amakhasimende amadala abuyela kimi futhi lokho kwangikhombisa ukuthi umkhiqizo uyasebenza,” kuchaza yena.
Ungazitholela umkhiqizo owenziwe kuleli osabalaliswa ezweni lonke. Nakuba ikhasimende likhokhela izindleko zokuhanjiswa komkhiqizo, uNksz Magubane uyazama ukuthi umkhiqizo ungabizi.
Kuningi okunye abantu abasazokubona. Le ntokazi esingungoti ekukhiqizeni imikhiqizo engenawo amakhemikhali isaqhubeka nokwenza eminye imikhiqizo, kukhona esikhuluma nje iphezu kwawo.
Nazi izeluleko zikaNksz Magubane
- Yiba nothando nozwelo uma usebenza ngesikhumba sabantu.
- Yiba nomqondo ovulekile.
- Yenza ucwaningo lwakho futhi uthole lapho amakhasimende ekhona.
- Yiba nenhliziyo enozwelo uma kuziwa ekusebenzeni ngesikhumba sabantu.
FUNDA FUTHI: Oletha ushintsho: UPatel uzikhathalele kakhulu ezolimo eMzansi
Bhalisa kuMzansi Today: Iziko elikulethela izindaba zezolimo nsukuzonke.
