Omunye wabaklonyeliswe iFood for Mzansi nge-Changemakers award, uMnuz Malapane Thamaga, uthe indondo yakhe uyinikela kwezinye izishoshovu zezolimo. Lesi simemezelo usenze ngesikhathi kune-Young Farmers Indaba eba minyaka yonke, ebiseGauteng.
UThamaga wamenyezelwa njengomunye wabantu abaletha ushintsho ngenxa yokuzinikela ekuthuthukiseni ukulima nezolimo jikelele.
Njengemenenja ehhovisi likamengameli nelesikhulu esiphezulu kwi-African Farmers Association of South Africa (i-Afasa), ubambe iqhaza elikhulu ekusunguleni uphiko olubhekele imikhiqizo enhlobonhlobo. Unolwazi olunzulu ngale mboni njengoba engusomnotho wezolimo futhi uke wamela ungqongqoshe wezolimo, ukuthuthukisa umhlaba nezindawo zasemakhaya kwi-Maize Trust. UThamaga unamava nolwazi olujulile embonini yezolimo.
Engxoxweni neFood for Mzansi, uThamaga uchaze ukuthi kusho ukuthini ukuwina lo mklomelo.
“Lo mklomelo ukhombisa ukuthi ukhona obonayo futhi ohlabeke umxhwele ngomsebenzi esiwenzayo nsukuzonke ekuthuthukiseni ezolimo eNingizimu Afrika,” kusho yena.
Tiisetso Manoko (TM): Halala. Kusho ukuthini kuwena ukuthola lo mklomelo?
Malapane Thamaga (MT): IFood Mzansi Changemarkers Award isho ukuthi kukhona abaqaphelayo umsebenzi engiwenzayo emkhakheni wezolimo. Kulo mkhakha akufani nakweminye lapho kubhekwa ukuthi inzuzo oyenzile ingakanani okuyiyo echaza ukuthi usebenze kangakanani. Lapho sigxile khona ekuhlanganiseni imigomo nanokuba yisishoshovu, kuthatha isikhathi ngaphambi kokuthi kubonakale imiphumela.
Ngakho-ke lo mklomelo ukhombisa ukuthi ukhona obonayo futhi ohlabeke umxhwele ngomsebenzi esiwenzayo nsukuzonke ekuthuthukiseni ezolimo eNingizimu Afrika.
TM: Ikuphi okuzuzile uma ubheka ukukhula nokuthuthuka emkhakheni wezolimo?
Malapane Thamaga: Impumelelo yami kwezolimo ngiyikala ngesibalo sabalimi asebesizakele ukufeza amaphupho abo. Mathathu amaphuzu angasetshenziswa ukuphendula lombuzo:
- Iqhaza lami ekusunguleni i-AFASA
Okokuqala ukulekelela ukusungula i-AFASA igcine isizimele, ingasathembele kwiNERPO ukuze ingabhekeleli imboni edayisa inyama ebomvu kuphela, kodwa kungene neminye imikhiqizo futhi nabanye abantu abenza ezinye izinto. Lokhu sakuzuza ngokusebenzisana noMengameli we-AFASA, uDkt Vuyo Mahlati;
- Ukwenza izigcawu zokuthi abalimi bakwazi ukubonisana nabaphethe ezolimo nezikhulu zikahulumeni.
Okwesibili, ukuhola izigcawu zokubonisana lapho abalimi bezozikhulumela ngqo nabaphethe izinkampani kanjalo nezikhulu zikahulumeni kuhlanganisa nehhovisi likaMngameli. Sisebenzisa i-AFASA Agricultural Transformation Conference eba minyaka yonke, i-AFASA Business Breakfast sessions, imibukiso eyenziwa emgwaqweni nengqungquthela ebiyenziwa ngobuchwepheshe besimanje i-Agricultural Transformation Focus, okulekelela izinhlangano ezihlukene;
- Ukuzibandakanya nezinhlangano ezehlukene zezolimo
Okwesithathu, okungokogcina, ukubamba iqhaza ezikhungweni noma ezinhlanganweni ezehlukene zezolimo kuzo ezifana ne-AgriBEE ne-Maize Trust kusho ukuthi kuyabhungwa ngemibono yokuthuthukisa lo mkhakha.
Angikuveze ukuthi kusekuningi okumele kwenziwe, kuyangijabulusa ukuthi kuningi osekuvele kuhleliwe okuzosiza abalimi bafeze amaphupho abo.
TM: Ucabanga ukuthi yini eshodayo ukuze kuqedwe izingqinamba zezolimo ikakhulukazi ezibhekene nentsha kwezolimo?
Malapane Thamaga: Isikhathi esiningi intsha ayifuni ukuphatha izikhundla, idedela abantu abadala kube yibo abayiholayo, bona babe izibukeli noma bagxeke nje kuphela. Kwesinye isikhathi abangeni kulezi zikhundla ngoba bengafuni ukungena kwipolitiki kanti ayikho indawo engenayo ipolitiki yayo, uma izinqumo zithathwa abantu ngokuhlanganyela.
Ngeshwa, izinqumo eziningi ezithathwayo ezweni zithathwa ngaphandle kokuthi intsha ibeke eyayo imibono ngoba ikholelwa ukuthi kungukuchitha isikhathi ukuhambela izigcawu zokubonisana ngezinto Okubuhlungu ukuthi abalimi abaningi sebeyintsha, bakufundele abakwenzayo futhi banolwazi olungasiza ekukhombeni indlela nokwenza isiqiniseko sokuthi abaphethe bayaphendula ngezinqumo abazithathayo kodwa abakukhuthaleli ukuba yingxenye.
Ngakho-ke ngiyafisa ukukhuthaza abantu abasha ukuthi baziphathe izikhundla, banikele ngesikhathi sabo. Akudingeki ukuthi uze ube umholi wesifundazwe noma kazwelonke uma usaqala. Ungaqala ezingeni lokuhlela izigcawu zokwabelana ngolwazi, usize ekuhlelweni kosuku lwabalimi bese uyakhula.
TM: Yini engenziwa ukuthuthukisa ukuzihlela kwezinhlangano zezolimo eNingizimu Afrika?
Malapane Thamaga: Izinhlangano eziningi zisungulwa kuphuthunywa kungabe kusaqikekelelwa ukuthi zinobuholi obuqinile obuzokwazi ukuphendula ngezinto ezithinta inhlangano, kuqinisekiswe ukulandela imigomo ukuxazulula izinkinga.
Ngeshwa, lokhu kudala ukuthi kugcine kunezinhlangano eziningi ezenza into eyodwa, okwenza kube nzima ukuthi uhulumeni wezolimo akhulume nazo zonke lezi zinhlangano ngoba zikhuluma ngokwehlukana.
Ngokujwayelekile kuba namahlabuka ngenxa yezizathu ezintathu, ukungaboni ngasolinye, ukuhluleka ukuxazulula izinkinga nokuzibona umkhulu kunenhlangano okuyo nokuba buthaka kwezinhlaka zokuphatha.
Izinhlangano ezihlubuke kwezinye ngokujwayelekile kwenziwa izizathu ezintathu:
- Ukungaboni ngasolinye nokuhluleka ukuxazulula ukuxabana
Sesakhe isiko labaholi abangafuni ukuholwa. Ngaphansi kwaleli siko abaholi bazibona kuyibona kuphela okumele bahole, yize imigomo yenhlangano iyibeka icace imigomo okumele ilandelwe;
- Ukuzibona umkhulu kunenhlangano oyimele
Okunye okuhambisana naleli phuzu lokuqala; ngesinye isikhathi abaholi bacabanga ukuthi bakhulu kunezinhlangano abakuzo bese befuna ukuzithathela izinqumo ngaphandle kokulandela inqubo yokubonisana nababamele; bese
- Ubuthaka bezinhlaka zokuhola
Uma kusungulwa inhlangano sekuphuthunywa akubhekwa ukuthi abaholi bazokwazi yini ukuxazulula izinkinga uma sekufike leso sikhathi nokuthi ubuholi buzokwazi ukuhlale buphendula imibuzo amalungu aleyo nhlangano. Ngeshwa, loku kuholela ekutheni kube nezinhlangano eziningi ezenza umsebenzi ofanayo okwenza uhulumeni angakwazi ukukhuluma nazo njalo ngoba zikhuluma ngokwehlukana.
TM: Okokugcina, umyalezo wakho oqondiswe kubalimi baseMzansi
Malapane Thamaga: Ngeke ube umlimi ozimele yedwa. Kungabukeka sengathi ukulima kulula uma ukubukela kude kodwa kunezinselelo zako. Ngenhlanhla, bakhona abalimi abasuke sebenesikhathi bekulo mkhakha. Kubalulekile ukubheka ukuthi imuphi ongasebenzisana naye akusize uze ukwazi ukuzimela, kumele nihlale nihlangana nibe ngamaqoqo ukuze nizokwazi ukuxazulula izinselelo ngokuhlanganyela kunokubhekana nazo uwedwa. Thintanani ne-AFASA eseduze izonisiza nakhe iqoqo.
Yiba yingxenye yenhlangano yabalimi. Uma ungeyona ingxenye yabalimi yabo ngicebisa ukuthi ujoyine eyodwa, i-AFASA ingenye yezinhlangano ongazijoyina noma ungumlimi osacathula. I-AFASA isanda kusungula izinhlaka ezibhekelele yonke imikhiqizo yezolimo, iCommodity Chambers. Uma uyingxenye ye-AFASA uthola usekwa ngokulima, usizo lokungena ezimakethe nosizo lokuthola imali yokusebenza nomhlaba.
Phokophelela ukuthuthuka kodwa wazi ukuthi kungenzeka kungahambi ngendlela obuhlele ngayo. Awuyeki ukufunda emkhakheni wezolimo ngakho abalimi bayakhuthazwa ukuthi bahlale befunda okusha ngenani bahambele imibukiso yemikhiqizo yezolimo nezigcawu zokwabelana ngolwazi .Okunye okumele ukukwenze ukuzikala ukuthi izinga lakho lokuba umlimi liyakhula noma liyehla, khuphula isivuno sakho, imali eyinzuzo oyitholayo.
Ngokujwayelekile kuhlale kunethuba lokuthi kube nengozi engakhinyabeza umkhiqizo wakho. Ingozi engadalwa isimo sezulu, izifo noma ukuhlasela kwezilwanyana. Uma kuhlasele isimo esinjalo, kunzima ukuthola amakhasimende ngenxa yokushintsha kwemali yokudayisa neyokuthenga imikhiqizo yezolimo.
Ngakho njengomlimi kudingeka uhlale uhlomile wazi ukuthi kunezinselelo ezinjengalezi, ube namasu owahlelile okubheka nazo. Ngokunjalo kukhona namathuba avelayo ngakho kumele uhlale ubhekile ukuthi uma kwenzeka kuvela ithuba ulisebenzise ngokulandela imigomo.
OKUNYE ONGAKUFUNDA: Abalimi abamnyama bakhuthazwa ukuthi bahlangane ukuze babe nenqubekela phambili.
Bhalisa iMzansi Today: Izindaba zezolimo ozithola nsukuzonke. Thola konke okwenzeka ezogabeni ezehlukene zezolimo.
