uNksz Mokgadi Manamela, Umlimi oneminyaka ewu-33 ubudala wasesigodini saseLissa-Gakgare, eLimpopo, wayefuna ukuba ngomunye wabakhiqizi bamaveji angafakwe makhemikhali ezweni. Wayengafuni nje kuphela ukukhiqiza izitshalo ezinohlonze kodwa nokufaka isandla ekuqinisekiseni ukuthi izwe linokudla okwanele.
“Ubaba wayengumlimi futhi efuyile, ngakho ngikhule ngibamba amatoho ngokulima naye,” kusho yena ekhumbula.
“Yize ngangifisa ukufana naye kodwa ngangifuna ukwenza ngendlela ehlukile kuneyakhe. Wayengumlimi omncane kodwa mina ngangifuna ukuba umlimi omkhulu odayisela kuleli nakwamanye amazwe ukuze ngizozakhela igama izingane zami ezizongikhumbula ngalo,” usho kanje.
FUNDA OKUNYE: Obebhuquza ekhaya neziqu usengumlimi futhi uyakuthanda!
Uthando lwezolimo kuNksz Manamela lwalumandla kangangokuthi ngangokuthi mhla ezama ukusebenza emkhakheni we-Environmental Management Science, wagajwa wuthando lokulima.
“Emuva kokuphula iziqu zami eNyuvesi yasePitoli ngo-2012 ngavula inkampani ye-environmental management, health and safety engiyiphethe nodadewethu. Ngithe ngisenza lokho, zangilanda ezolimo zangikhumbuza imvelaphi yami, ngakho ke nginqume ukukuhlanganisa kokubili,” usho kanje.
ze-Environmental Management Science
Inkampani yakhe iluleka abalimi ezweni lonke ibafundise ngokulima, ukuqwashisa ngemvelo, ngezempilo, ukuphepha, ukunakekela imvelo nokuthola amalayisensi okulima. Ubuye afundise izisebenzi zasemapluazini ngokuxhashazwa, nokusebenzisa imishini ukugwema ukulimala emsebenzini, ukusebenzisa amanzi ngokuwonga nokuthi yiziphi izitshalo ekumele zitshalwe ukugwema ukumosheka kwamanzi.
Inkampani iqale ukusebenza ngo-2012 kodwa igcine ivulwa ngokusemthethweni ngo-2015. “Siqale ePitoli kodwa manje sesisebenza ezweni lonke,” usho njalo.
UNksz Manamela usebenzisa amakhono akhe okuphatha imvelo ukuqhuba umsebenzi epulazini lakhe elingamahekthare awu-10 i-AgriHlase. Ulandela izindlela zokulima ezingazifaki izikhuthazi futhi uyawashintshanisa amaveji awatshalayo.
“Okwamanje nginamasimu amabili, insimu eyodwa inombila kanti enye inokotini. Ngingomunye wabesifazane abambalwa abamnyama eNingizimu Afrika abalima ukotini abasizwa abakwaCotton SA, abangisizile ukuthi ngithole ukotini osezingeni elifanele.
“Yisikhathi sokuvuna kanti njengoba sisebenza neCottonSA, sebevele basinikeza namakhasimende azothenga ukotini kithina ukuze enze izingubo. Mangabe usuvuniwe ukotini sizotshala amazambane.”
UNksz Manamela uhlela ukunweba ipulazi lakhe ukuze abe nendawo eyanele yokutshala amaveji ukuze ezodayisela izinkampani ezinkulu ezifana noSimba noKnorr. Ufuna udayisela namanye amazwe
“Uma senginemali eyanele ngiyolifeza iphupho lami, ngoba ngizokwazi ukusebenzisa enye indawo yami, ingamahekthare angu-15 ubukhulu futhi ayikude nalapho engilima khona.”
UManamela ubenelinye ipulazi eGauteng kodwa ngenxa yokuthi kwakunombango womhlaba, lagcina lidayisiwe. Uthi ufuna ukuthenga elinye ipulazi eGauteng ngoba yilapho ehlala khona.
“Ezolimo zidinga uzibambele futhi ube khona ukuze kuphumelele.”
Lo mlimi ophothule uMatikuletsheni eBakone Nkwe Secondary School uqashe izisebenzi ezintathu epulazini nabaqondisi ababili enkampanini yakhe yezemvelo. Uthi ezolimo azilula.
“Ukulima kudinga uzibambele. Kwesinye isikhathi uyalahlekelwa uma ulima, kwesinye isikhathi uzuze, ngoba kuncike kwezemvelo kubuye kudinge isineke.”
FUNDA FUTHI: Okwenze uMusa aqale efufusa kodwa kugcine sekuhamba kahle esikhathini esingangonyaka
Okumphumelelisile
UNksz Manamela uthi ukuhlonishwa iCorteva neCotton SA ezinye zezinto ezinkulu azizuzile.
“Ukuhlonishwa izinkampani kuyasiza kakhulu ngoba manje uyazi ukuthi kumele uxhumane nobani uma udinga usizo. ICoverta ingisizile ngathuthuka, ngathola usizo lwemali, ngadayisa futhi ngakhula.”
ICotton SA ingitholele amakhasimende, ngenkathi ngisebenzisana nabo uumkhiqizo wami ufinyelele kubantu. Kungenzeka ukuthi unawo umkhiqizo kodwa ungazi uzowudayisa kuphi nokuthi udinga umthamo ongakanani, iCotton SA ingisize ngalokho.
Ngelinye ilanga ufisa ukufuya izinkukhu nokudayisa amaqanda awadayisele izinkampanini ezifana neTiger brands, uWoolworths nezinye izinkampani ezibhakayo.
Iseluleko uNksz Mokgadi Manamela ululeka intsha efisa ukungena kwezolimo ngokuthi:
- Bheka amathuba – Maningi amathuba kwezolimo abantu abasha, badinga nje ukubheka ezindaweni ekuyizona bakhohlwe ipolitiki.
- Qala kancane – Ungaqala egcekeni lakho uma likhona. Ungaba nesivuno esihle engadini yakho encane.
- Iba nothando – kufanele ubenothando lokusebenza, ngoba ezolimo ziwumsebenzi.
- Cela usizo – kubalimi amakhulu, abakade baqala, bazokusiza.
FUNDA FUTHI: Obesebenza emakhishini usengumlimi ofuye izinkukhu
