Yize uhulumeni eqhubeka “nokuziba nokugwema” umsindo mayelana nomhlaba ongaphansi kwamakhosi, abalimi bayaqhubeka nokuhlukunyezwa abaholi bendabuko.
Abakwazi ukwenza izinqumo ngomhlaba abawusebenzisayo futhi bathwala kanzima ukukhulisa amabhizinisi abo ngoba abanawo amatayitela.
INingizimu Afrika inomhlaba ongamahekthare angu-18 million ongaphansi kwamakhosi. Lo mhlaba okahulumeni kodwa ulawulwa ngabaholi bendabuko. Yize labo abafisa ukulima bekwazi ukuwuthola kalula umhlaba kodwa abalimi abakwazi ukuthatha izinqumo ngoba umhlaba akuwona owabo.
U-Advocate Tembeka Ngcukaitobi, isishoshovu sepolitiki futhi onengosi kwiBusiness Day uthe: “Uma kukhona umuntu ongacacisa ngokwezepolitiki mayelana nomhlaba osezindaweni zamakhosi, ubudlelwano phakathi kwamakhosi nabantu, yi-ANC. Nokho, iqhinga layo ukuyigwema nokuyiziba indaba yombango othinta umhlaba ongaphansi kwamakhosi,” kusho u-Adv Ngcukaitobi.
UNks Mmadipilo Letlape ofuyile eNorth West uthi kufanele ukwazi ukuzibamba ziqine uma ufuna ukuba ngumlimi emhlabeni ongaphansi kwamakhosi. Usebenzela esigodini iLesung.
“Inkunzi yami eyawo wonke umuntu futhi inkunzi yabanye nami ngeyami ngakho kunamathuba amahle okuthi angitholi amathole ami ohlobo lweSimbra. Omzala bami abanayo inkunzi kodwa bayahlomula ezinkunzini zethu futhi ayikho into esingayenza. Angikwazi ngisho ukulungisa isibaya ngoba wonke umuntu uzohlomula ngamandla ami,” kusho uNks Letlape.
Umhlaba awusebenzisayo akuwona owakhe ngakho akakwazi ukuthola itayitela, into ephazamisa izinhlelo zakhe zokukhulisa umsebenzi.
UNks Letlape wengeze ngokuthi: “Angikwazi ukuzenzela into yami (ngisasemhlabeni wenkosi). Nginethemba lokuthola umhlaba wami ngithuthe. Akuhambeki emgwaqweni oya epulazini uma linile. Ayikho imoto engenayo futhi angikwazi ukukulungisa lokho ngemali yami ekubeni kuzohlomula abanye abantu.”
Ezinye izinselelo ukuthi akakwazi ukwenza izinqumo masinyane ukuze kusizakale ipulazi. Imvamisa izinto ziyabambezeleka uma esecele imvume kanti kwesinye isikhathi izicelo zakhe ziyachithwa.
‘Ngahlukunyezwa…’
Umlimi waseMpumalanga otshale amaveji uMnu Sphesihle Chata uyachaza ukuthi yini eyamphoqa ukuthi athenge umhlaba esigodini sakubo eBethal, okuqhele ngamakhilomitha angu-155 naseGoli.
Uthi: “Emva kokulima futhi yonke into yayihamba kahle, kunabantu abafika kimina bathi yibona ababelima kulowo mhlaba, futhi bayawufuna. Kwafuneka ngiwushiye phansi wonke umsebenzi wami onzima ngikhulume nabaholi bendabuko lapho ngabuza khona ukuthi ayikho yini imali engingayikhokha ukuze ngisebenzise umhlaba isikhathi eside ngoba awukwazi ukuwuthenga noma uthole itayitela lawo. Into engayithola yincwadi eqinisekisayo kubaphathi ukuthi ngingawusebenzisa umhlaba kodwa kwakuyinselelo.”
UChata otshale umbila nobhontshisi uthe kubalulekile ukuthi uhulumeni ashaye umthetho wokuthi umhlaba ongaphansi kwamakhosi wabiwa futhi ulawulwa kanjani.
Ukhale esifanayo noNks uKeaboka Motsemme waseMahikeng, eNorth West, okhale ngendlela abaphethwe ngayo abaphathi bendabuko. Ngonyaka odlule wafaka isicelo somhlaba angalima kuwo. Asiphumelelanga isicelo sakhe.
“Ngangifisa ukukhulisa umsebenzi ukuze ngiyeke ukulima egcekeni. Ngatshelwa ukuthi umhlaba engiwufunayo uzosetshenziswa nguhulumeni ukuletha intuthuko, ngayeka kanjalo-ke,” kusho uNks uMotsemme.
‘Abaholi bendabuko kufanele benze kangcono’
I-Food For Mzansi izame ukukhuluma nabaholi bendabuko besizwe saBakwena baa Morare esigodini iPella, eNorth West. Okholume nathi ucele ukuthi igama lakhe lingadalulwa ngoba akagunyaziwe ukukhuluma nabezindaba yize ezwelana nosizi lwabalimi.
“Kukhona intokazi esencane eyafika ifuna ukulima, kwakungewona nomhlaba omkhulu kangako lona ababefuna ukuwulima. Kodwa umkhandlu wenkosi wanqaba, ngeke ngikwazi ukuzichaza izizathu.
“Singenza kangcono njengobuholi bendabuko ukuqinisekisa ukuthi umhlaba uyatholakala ngoba siyabona ukuthi iyanda intsha enentshisekelo yokulima iziphilise ngakho. Kufanele siyibhekisise indlela esenza ngayo izinto futhi masinyane,” usho kanje.
‘Alarm bells should be ringing’
Umbiko owake wakhishwa i-Institute for Poverty, Land and Agrarian Studies (iPlaas) e-University of the Western Cape wathola ukuthi uhulumeni uyaphuza ukuphendula izikhalo zabalimi abaningi abadinga umhlaba.
“Akwamukelekile ukuthi ngale kokuphuza ukunikeza abantu okungokwabo nomhlaba, uhulumeni uziphatha kanjena,” kusho abacwaningi oNks Constance Mogale noKatlego Ramantsima.
UNks Mogale uyi-national coordinator ye-Alliance for Rural Democracy besekuthi uNks Ramantsima ungumcwaningi futhi wenza iziqu zobudokotela kwiSARChI chair ePlaas.
“Indaba yomhlaba iyinkinga eNingizimu Afrika. Futhi uhulumeni awunandaba nokuyilungisa ngendlela enobulungisa neneqiniso. Kufanele ngabe sikhathazekile,” kusho oNks Mogale noRamantsima embikweni wabo.
“Njengoba indaba yomhlaba ongaphansi kwamakhosi ivele inabantu abaningi futhi namalungelo ethinta abantu abaningi kusho ukuthi kumqoka impela ukuthi kuphothulwe indaba yokubuyiswa komhlaba. Kuhamba kanjani ngokuphothula lezo zicelo?”
FUNDA OLULANDELAYO: ‘Abesifazane badinga umhlaba abazolima kuwo’
Bhalisa kuMzansi Today: Izindaba zakho zansukuzonke ngokwenzeka kwezolimo.
