Umsunguli wohlelo lwezalukazi KwaZulu-Natali i-Granny Programme ukholwa wukuthi uma uthuthukisa ugogo, uthuthukisa umphakathi wonke
E-Valley of a Thousand Hill enhle lokhu okungafelwa nkonyane KwaZulu-Natali kunomhlengikazi osathatha umhlalaphansi oneminyaka ewu-79 uNkk Cwengekile Myeni. Kukule ndawo lapho uNkk Myeni enikele khona ngeminyaka engu-30 yempilo yakhe esebenza emtholampilo i-Halley Scott Clinic e-Botha’s Hill.
Ngemva kwezinyanga ezintathu vo ethathe umhlalaphansi, uNkk Myeni waxhumana nenhlangano engenzi inzuzo i-Hillcrest AIDS Centre Trust (i-HACT) ukuqala uhlelo lokusiza izaguga zendawo.
Ukuphumelela izingadi
Namuhla, ngemva kweminyaka engaphezu kweyishumi, iphupho elihle likaNkk Myeni selifezekile njengoba izaguga zendawo zenza inqwaba yezinto futhi zilima nezingadi eziwu-33. Izingadi zogogo zondla ogogo abangaphezu kuka-500 nabazukulu abawu-4 000 endaweni.
Ingabe yini eyenza umhlengikazi osethathe umhlalaphansi asungule inhlangano esiza umphakathi? Ngenkathi esasebenza uNkk Myeni wabona indlela isandulelangculazi nengculazi okuthinta ngayo impilo yogogo bendawo. Uthi iningi logogo “lishonelwa ngabantwana ngenxa yalesi sifo bese lisala linakekela abazukulu”.
“Ngabona ukuthi ayikho into eyenziwayo ukusiza laba bantu besifazane. Banezinselelo eziningi ezingafani nezabanye nezinto zabo hhayi zabantu besifazane abakhulile kodwa nangenxa yemiphumela yobhubhane lesandulelangculazi nengculazi,” kusho uNkk Myeni.
Ngenkathi luqala uhlelo ngo-2006, lwalusungulelwe ukweseka ogogo ababetabalasa ukunakekela abazukulu abayizintandane ngokwesimongqondo nezenhlalakahle. Ngokusho kukaNks Claire Hodgkinson, imenenja yezokukhangisa nokuqoqa imali eHACT, akuthathanga sikhathi esitheni ukuthi lolu hlelo lugcine seluqhamuka nezinye izindlela zokuthuthukisa umphakathi.
“Kwathi lusuka laqhamuka nezinye izindlela zokuthuthukisa ogogo ngazo zonke izinto empilweni yabo ukuze bahlomule futhi kuhlomule aabazukulu abayizintandane ababanakekelayo abaningi,” kwengeza uNks Hodgkinson.
Inhloso yamasimu
Eminyakeni ewu-13 edlule lolu hlelo selukhuthaze ukuthi abantu bazinakekele, badle ukudla okunempilo futhi bavocavoce umzimba. Ezingadini eziwu-33 ezisemphakathini zabesifazane abakulolu hlelo kutshalwa isipinashi, iklabishi, ukherothi, u-anyanisi, amazambane, u-beetroot nobhatata. UNks Hodgkinson uthi lokhu kudla kondla ogogo abangaphezu kuka-500 nezingane eziwu-4 000 ngenyanga.
“Ngikholwa wukuthi uma uthuthukisa ugogo, uthuthukisa umphakathi wonke,” kusho uNkk Myeni.
“Izingadi zogogo bethu sezibaluleke kakhulu ngoba sifuna ukubafukula nokubathuthukisa kodwa asikwazi ukwenza lokho belambile futhi bengenayo indlela yokondla imindeni yabo nsuku zonke,” kwengeza uNkk Myeni.
Ngalolu hlelo sekukhona amaqoqo okweseka ogogo awu-68. Omunye wogogo uNks Thengiwe Khanyeza, oneminyaka ewu-63. Uthi ingadi imsizile ukondla umndeni wakhe. “Ngingene eqoqweni elibizwa ngeNkululeko eminyakeni emithathu edlule ngemva kokuxoxelwa wumakhelwane ngalo,” kusho uNks Khanyeza.
UNks Khanyeza nguyena onakekela abazukulu abane kanti uthi “ukusebenza ezingadini kunzima kodwa kumnandi futhi kupholisa ikhanda. Siyaxoxa futhi sihleke ngesikhathi silima.”
Ngokukhula kohlelo uNkk Myeni nethimba lakhe babonile umphumela omuhle empilweni yogogo. Njengogogo wabantwana abawu-12, uNkk Myeni uthi: “Ngikholwa wukuthi uma uthuthukisa ugogo, uthuthukisa umphakathi wonke.”
