Owayekade engu-teller ebhange futhi manje osenebhizinisi lokudla, uNkk Metjie Shongwe, usicobelela ngerisiphi yakhe engambi eqolo yokupheka amanqina engulube. Amanqina engulube adle ngokunona nangesikhumba esiqinile, ngakho ukuwapheka kuthatha isikhathi eside.
Abantu abahlukene emhlabeni bayipheka ngendlela engafani lenyama ehlukile kwezinye. Kodwa cishe ongakwazi wukuthi kunempilo kangakanani ukudla amanqina engulube.
Amanqina engulube anonile futhi anesikhumba esiqinile. Amaresiphi amaningi aphekwa isikhathi eside, ngenhlanhla, ukuwapheka isikhathi eside yikona okukhiqiza umsoco.
Kungathatha isikhathi eside ukuwapheka kodwa awusikhaleli isikhathi owalinda sona uma usuwadla econsisa amathe.
“Ngiyakuthanda ukuthi amanqina engulube awabizi nokuthi ziningi izindlela zokuwapheka ikakhulukazi uma ubheka nanokuthi anomsoco kangakanani,” kusho uNkk Shongwe.
UNkk Shongwe wafinyelela kubantu abangaphezu kuka-100 000 ekhasini lakhe lika-Facebook Cooking with Metjie lapho abelana khona ngamaresiphi awakhonzile kodwa angalumeli ephaketheni.
Abechitha ngakho isizungu sekuwumsebenzi
Eminyakeni ambalwa edlule uNkk Shongwe wanquma ukuthi akashintshe into yokudla ayezenzela yona ukuchitha isizungu ayiphendule ibhizinisi. Amaresiphi akhe angambi eqolo awabhala ekhasini lakhe lika-Facebook asebonwe yizinkulungwane zabantu. Iningi labalandeli bakhe aliwuvali umlomo nge-atchar ne-chilli sauce.
Uphinde abe nebhizinisi lokuphekela imicimbi nokuhlobisa kanti ngelinye ilanga uyafisa ukushicilela incwadi yakhe ekhuluma ngokudla kanjalo nokuthi i-vegetable atchar ne-chilli sauce yakhe kudayiswe ezitolo zokudla ezinkulu eMzansi.
“Ngizifundisile ukupheka ngase ngivula ikhasi likaFacebook lapho ngabelana khona ngokudla engikuzamayo namaresiphi engizihlanganisela wona ekhaya.”
Ngokwabelana ngamaresiphi aziwayo futhi alula, uNkk Shongwe uhlose ukugqugquzela labo bantu abangenayo imali etheni. “Into engiyifisayo nje wukugqugquzela abantu besifazane abangakwazi ukupheka noma abangenayo imali yezithako ezibizayo, ngakho sisebenzisa esinakho ukuze senze into emangalisayo. Ikhasi lami lisanda kufinyelela kubantu abangu-100 000.”
Yenza amanqina kaMetjie
Lokhu kudla okumnandi futhi okulula kungajabulisa umndeni wakho nabangani.
Amanqina engulube kaNkk Shongwe aphekwa aze athambe efakwe isinongo esibabayo, angadliwa nesitambu nanoma yimaphi amaveji owathandayo.
FUNDA FUTHI: Nge-bunny chow kaZanele ongeke usinike singaboni
Ingredients
- 500g wamanqina engulube
- Usawoti
- 15ml we-turmeric
- 4 tbsp ze-tomato paste
- Uhhafu ka-anyanisi oqotshiwe
- 15ml ka-breyani masala
- 500ml wamanzi
- 45ml we-thick soy sauce
- 2 tablespoons zamafutha
- 60ml we-paprika
- 3 tbsp we-spring onion, oqotshiwe
Instructions
Indlela yokupheka
- Faka amanqina emanzini abandayo, ufake nosawoti bese uyawapheka amahora amathathu aze athambe.
- Yengeza nge-soy sauce, i-breyani masala, i-paprika, i-turmeric, i-tomato paste, u-anyanisi, i-spring onion, amafutha ne-ground pepper.
- Qhubeka uwapheke eminye imizuzu engu-20 bese uyadla.
