UNthanyiseni Muvhenzhe ukuthanda kakhulu ukupheka. Luthando lwakhe analo ngabantu, nakuba kunjalo, olutshintshe ishishini lakhe lesosi, iKupisa Sauce, yayile nkampani iphumeleleyo iyiyo namhlanje.
Ezalelwe wakhulela eLimpopo, uMuvhenzhe unembali emvelaphi yayo ikulawulo lokuthengwa kweempahla neenkonzo. Wafudukela eGauteng ukuya kuqhubela phambili ngezifundo zakhe kwezorhwebo, uqoqosho, nakulawulo lwamashishini, kodwa waqalisa ukupheka iisosi njengentsebenzwana yokuzonwabisa – eyathi yajika yalishishini ngowe2018.
“Ndandidla ngokuphekela inkosikazi yam kunye nam itshili sosi ukuze sitye ekhaya. Inkosikazi yam ikuthanda kakhulu ukutya okubabayo. Ngamanye amaxesha iindwendwe ziyafika, njengabahlobo nezizalwane zam, bayilinge itshili sosi yam yaye bayayonwabela.”
UMuvhenzhe uthi uzithanda kakhulu ezolimo kwanokupheka. Ukudibana kolu thando lumandla, kwakunye nengxelo echulumancisayo ayifumeneyo isuka kubahlobo nakusapho, yile ndlela iKupisa Sauce eyaqala ngayo.
“Kwakukho izicelo: ‘Khawuncede, akunakusongeza wenze enye itshilisi?’, yaye abanye babo babezimisele nkqu nokuyihlawulela. Kungelo xesha kanye endaye ndabona ithuba leshishini.”
Ukwenziwa kophawu lorhwebo lwetshili sosi, iKupisa
Eyenziwe ngezityalo zemveli nangezinye izinto ezahlukeneyo, iKupisa Sauce yahlukile kuba iqulethe isithako esisodwa.
“Okubaluleke ngakumbi yitshilisi ebizwa ngokuba yiAfrican Bird’s Eye, endiyifumana ubukhulu becala eZimbabwe naseMalawi. Iluhlobo olukhetheke ngokukodwa lwetshilisi. Inencasa evakala kamnandi, yaye isisiveliso esikumgangatho ophezulu kakhulu.”
UMuvhenzhe uthi le sosi iqulethe iisosi ezilishumi elinesixhenxe, ezisixhenxe kuzo zizityalo ewayekhule ezitya eLimpopo. Lo gama wayesenza uphando ngeshishini, wafunda ukuba ezi zityalo zazingaxhanyulwa eLimpopo kuphela, koko kwenziwa njalo kwizwekazi.
“Siyazifaka ekuphekeni kwethu njalo, ukwenzela ukuba xa sipheka imifuno yakho okanye inyama, songeza izityalo zasendle. Zifana nemifuno kanye, kodwa zona uzifumana endle. Ziphucula incasa yokutya yaye ezinye zazo zinoncedo lonyango.”
Ingxaki elungileyo ukuba nayo
Njengakwamanye amashishishini amancinane, uMuvhenzhe ufumene imingeni yokumisela ukuqalisa umsebenzi wakhe. Uthi ulwazi lwakhe olumvelaphi yalo ikwezeempahla neenkonzo alukhange lumlungiselele ukushishina kwishishini lokutya, ngoko wayenento eninzi ekwakufuneka ayifunde.
“Kwakuthetha ukuba iimini ezininzi nobusuku bazo kwakungalalwa, kuphandwa ukwenzela ukuba kuqondwe ukuba umthetho uthini na yaye iyintoni imigangatho eyimfuneko kumashishini okutya. Khumbula, izinto abantu abazityayo mazibe zezomgangatho ophakame kakhulu yaye zichaphazela impilo. Akufuni abathengi bakho babe neengxaki xa besebenzise isiveliso sakho.”
Omnye umngeni omkhulu owafunyanwa nguMuvhenzhe yimfuneko ngokugqithisileyo yesiveliso sakhe. Uchaza ukuba iimalike zokuqala zakhe zaziseGauteng, eLimpopo, naseMpumalanga, kodwa oko kwakhawuleza kwanwenwela nakwezinye iindawo.
“Ngoku ndinabathengi abakude njengaseKapa, eZambiya, eNamibhiya, eBotswana, eZimbabwe, yaye oko kuthetha ukuba iimfuneko zam zokuthengwa kweempahla zimele ukufezekisa le mfuneko. Kufuneka ndibe nako ukusa isiveliso sam apho yaye ndikwenze oko ngokukhawuleza.
“Yingxaki elungileyo ukuba nayo xa imfuneko ingaphezulu kunokuba kulindelekile. Into nje kukuba ngoku, kufuneka ndenze izinto ngokukhawuleza.”
Inkqubo ebeka phambili abantu
Ngokuqinisekileyo, uthando olumandla yenye yezinto ezimqhubela phambili uMuvhenzhe. Olo thando lumandla, nakuba kunjalo, luqhutywa ngabantu.
“Okungaphezulu kwayo nayiphi na into, kuye kwangabantu endidibene nabo kolu hambo. Iye yayinto echulumancisa kakhulu ngolona hlobo. Ndihlangana nabantu ngabantu yaye ndifunda okuninzi kubo. Leyo yeyona nto iyinzuzo ngokuba kweli shishini.”
UMuvhenzhe ucaphula ukuhlangana nabantu ngabantu njengesona sizathu sisisiseko sakhe sokuqhubeka esebenza, ngaphandle kwemingeni anokujamelana nayo.
“Ndiqhagamshelana noninzi lwabathengi bam. Bandithumela imifanekiso yeebhotile zeKupisa ezisezifrijini xa beneebhrayi, izidlo zabo, xa besezirestyu, bathatha imifanekiso. Ndiyayithanda loo nto. Oko kundigcina ndichulumancile.”
Ukusuka kusomashishini othile ukuya komnye
UMuvhenzhe uneli cebiso lilandelayo malunga nabo banokuba ngoosomashishini bezolimo:
Yiba nothando olumandla
Yenza into oyithandayo. Yenza oko ukuthanda kakhulu kuba kuseza kuhamba kube nzima. Ukuba kunzima, yaye akunathando lumandla ngoshishino, kuya kuba nzima ukuqhubeka.
Ishishini ngabantu
Kufuneka uyiqonde into yokuba akungomnini weshishini ncam. Ngabantu abangabanini beshishini. Abathengi ngabo abangabanini beshishini, abazisimpahla bakho ngabo abangabanini beshishini, njl. Kufuneka uphangalale ukucinga ekuthini kukho impembelelo eninzi esuka kubantu eya kuchaphazela ishishini lakho. Wena [kwakhona] kufuneka ubathande abantu. Yiba nobubele. Ngokucacileyo, ekupheleni kosuku, uxanduva lukuwe lokwenza ishishini libe yimpumelelo, kodwa yiqonde into yokuba lishishini labantu.
Yiba ngumntu ofundisekayo
Akwazi yonke into, ngoko ke kufuneka ufunde. Yiba ngumntu ofundisekayo, ubuze xa ungazi. Fumana abanye abantu ukuba ufumana ubunzima ngento ethile kuba ishishini asikokuthengisa nje kuphela, asikoyila izinto kuphela, liquka [eminye imiba enjengale-] ezemali, umzekelo. Uyifunda phi loo nto, ukuba ngaba, kwimeko yam, indawo osuka kuyo yeyokuthengiswa kweempahla neenkonzo? Kum, ibisoloko ingamalungiselelo into ephambili, kodwa ngoku nam ngokunjalo ndiyakwazi ukulawula iimali zeli shishini. Kufuneka ndenze imisebenzi emalunga nokubhenkisha ukulungiselela ishishini. Zezo ntlobo zezinto ongafuna ingcebiso yabanye abantu okanye ukuncedwa ukuzenza.
Ngumsebenzi onzima
Kufuneka usebenze nzima. Kufuneka usebenze iiyure ezininzi. Uza kulala ebusuku kakhulu. Uza kuvuka kwasekuseni. Ishedyuli yakho iza kutshintsha. Iimpelaveki zakho zinokungabi zezokunxibelelana nabantu kwakhona, koko ibe zezokusebenza.
KWAKHONA FUNDA: Amahlebo ka-Aldrin okuba ngumfama weetapile owaphumelela amabhaso
