Imingeni ejamelene nezolimo iyafana kuMzantsi Afrika wonke. Usoqoqosho oyintloko weAgbiz uWandile Sihlobo uchaza imingeni yaseMpuma Koloni neenkqubo zongenelelo ezifunekayo.
Emva kokubonisana namashishini ezolimo kumaphondo ahlukeneyo elizwe, ndikunye noogxa bam kwa-Agricultural Business Chamber of South Africa (Agbiz), sichithe ixesha naboshishino lwezolimo kwanamafama aseMpuma Koloni.
IMpuma Koloni liphondo lezolimo elibalulekileyo, elihlanganisa ngokwasemalini malunga ne6% yengeniso yecandelo ethe kratya ngexabiso yaqho ngonyaka, ngokwengqikelelo iyafana neyaseLimpopo, eMntla Ntshona naseGauteng.
Imingeni ngokubanzi eqhubekayo ukunxunguphalisa iingqondo zeenkokeli zamashishini ezolimo kweli phondo zisisoyikiso sokwenziwa kweenkonzo zikamasipala ezidodobalayo, inkohlakalo kwiiofisi zikarhulumente nokungaphumeleli kwamashishini ezoqhagamshelwano (o.k.t., iindlela, umzila kaloliwe, amanzi, umbane kunye namazibuko).
Oku kufeda ekwenziweni komsebenzi kukhokelele ekwandisweni kweendleko zokuqhuba ushishino kwiphondo nokususa utyalomali kwimisebenzi yamashishini ezolimo anesiveliso lusiwe kulondolozo lweendlela nakwezinye iziseko zophuhliso.
Ngaphaya kwale mingeni ziimbopheleleko zezolawulo, ezinjengeNkonzo yooGqirha beZilwanyana kaRhulumente kunye nemfuno yokuhlaziya ngokwale mihla uMthetho wama36 (uMthetho wama26 wowe1947) omalunga neeFethilayiza, iiFidi zaseFama, amaYeza ezoLimo noNyango lweMfuyo [Act 36 (Act 36 of 1947) for Fertilizers, Farm Feeds, Agricultural Remedies and Stock Remedies Act].
Sele kulithuba elide, uMzantsi Afrika wazamkelayo ezenzululwazi wakhokela izwekazi kuveliso lwezolimo, uxhamla ekwamkeleni ukusetyenziswa kweekhemikhali zezolimo ezibaluleke gqitha, iimbewu kwanamayeza emfuyo.
UMzantsi Afrika (SA) uyaphambuka
Nakuba kunjalo, isantya selizwe siyaphambuka kule ndlela intle. Sishiyeke ngasemva kwabo sikhuphisana nabo ngenxa yokulibaziseka nokusilela kakhulu kwiofisi yeRejistra, okukhokelela kwiziphumo ezingundoqo ezandisa isiveliso ezingafikeleliyo kwishishini lezolimo. Ukungaphumeleli kokuveliswa kwesigonyo sikazwelonke kwakhona kungundabamlonyeni, yaye ishishini lemfuyo kwakhona lisemngciphekweni njengoko ixesha lemvula liqalisa.
Amashishini ezolimo esisebenzisana nawo kwakhona achaze imfuno yoMzantsi Afrika yokwandisa iimalike zokuthunyelwa kweempahla kumazwe angaphandle ukulungiselela iziqhamo ezikhulayo kwanoko kuveliswa yimfuyo.
Ngaphezulu, kufuneka kubekho ukuphucuka kubudlelane phakathi kweshishini neenkampani zeenqanawa ukwenzela ukuba amazibuko aseMpuma Koloni akwazi ukufumana ubalaselo kwiinkonzo. Kuye kwakho amathuba apho amazibuko ephondo ebefumana ubunzima ukufumana imizila yeenqanawa ukulungiselela ukuhanjiswa kweziveliso zolimo kwiimalike zokuthunyelwa kweempahla kumazwe angaphandle.
Imfuneko yokuxhaswa ngemali kwezolimo, ingakumbi inkxasomali yezophuhliso ukulungiselela amafama asangenayo amatsha, kunye nemfuneko yokwakha intembeko nokuphendula ngokwenzayo, kwakunye nokufezekiswa, ukubekwa esweni nokuhlolwa kwezicwangciso zamacandelo ahlukeneyo, lwakhankanywa ngokunjalo kwiinkqubo zokwenziwa komsebenzi.
IIinkqubo zongenelelo ngoncedo
Imingeni endiyichaza apha ngentla ifumaneka kwiimeko zonke ayiphelelanga kwimisebenzi noxanduva lwesebe lezolimo, inguqu yezomhlaba nophuhliso lwasemaphandleni. Oku kuthetha ukuba olu hlobo lwentsebenziswano norhulumente kuya kufuneka lube banzi lubandakanye iSebe lemiSebenzi kaRhulumente nezoThutho, phakathi kwezinye.
Amashishini ezolimo sekulithuba bebambe iingxoxo ngale miba kumaqonga ngamaqonga esizwe kwanokubonisana ngqo nabakwaTransnet kunye nabanye abanebango. Abathathinxaxheba becandelo lezolimo babamba iincoko qho noTransnet ngokusebenza kakuhle nangobuchule kwamazibuko.
Ukuza kuthi ga ngoku, iTransnet sekulithuba izivulile izandla ukuqhuba imboniswano yaye inobuchule bokusombulula imingeni enjengokwakhiwa ngokutsha kweZibuko laseThekwini emva kweempuphuma ezazitshabalalisa.
Ukuya phambili, abathathinxaxheba becandelo lamashishini abucala bafuna ukuphicotha amathuba okufumaneka kobuhlakani obubhetele kumasebe ahlukeneyo amazibuko, okunokunceda ekuphuculeni ubuchule, hayi nje kuphela kwezolimo kodwa nakwiindidi ngeendidi zamashishini anjengemigodi nezithuthi.
Ukukhula kokuthumela ngaphandle e-Agbiz
Ngokuvunyiweyo, uxinzelelo lokukhula kokuthunyelwa kweempahla kumazwe angaphandle kuye kwayinto ekhawuleze kakhulu njengoko isiveliso sezolimo sithe rhoqo ukuphucuka yaye nelizwe linomlinganiselo omncinane wokwamkela imveliso entsha.
Njengoko sele ndichazile ngaphambili kula makhasi, uMzantsi Afrika uthumela kumazwe angaphandle isiqingatha seziveliso sawo ngokwemimiselo yamaxabiso. Ngoko ke, iinzame zikarhulumente nezamashishini zokwandisa imveliso eqhubeka ngaphakathi elizweni kufuneka ibethelelwe ngokwandiswa kweemalike zokuthunyelwa kweempahla kumazwe angaphandle.
IJapani, iTshayina, i-Indiya, iSaudi Arabia, iBangladesh, iPhilippines neSouth Korea zihleli ziziimalike eziphambili apho amashishini ezolimo lwaseMzantsi Afrika anomdla wokwandisa ubukho bawo. Ndiyaqhubeka ukuchaza ezi malike kumasebe karhulumente afanelekileyo nakwiOfisi yoBongameli.
Ubukho babathathinxaxheba bezolimo kwindibano yakutshanje ebiphakathi koMzantsi Afrika kunye neSaudi Arabia ime njengomzekelo wento esiyifunayo ukubonisa intsebenziswano nokutshatshela kwiziveliso zolimo ze“South Africa Inc” njengelizwe. Oku kumele kukulandelwa yimboniswano karhulumente yezobugcisa ukuvula indlela yokuthunyelwa kumazwe angaphandle kweziveliso zolimo zaseMzantsi Afrika.
Isicwangciso sokusebenza
Ngokubhekisele kwinkxasomali yezolimo, ugxininiso lwalukwisixhobo esihlanganiseleneyo esisandula ukuqaliswa sezemali lisebe lezolimo, inguqu kwezomhlaba kwanophuhliso lwasemaphandleni kunye neBhanki yezoMhlaba. Esi sisiveliso esiyimfuneko yaye siya kufaka igalelo elihle ekukhulisweni kwecandelo kwanokuhlangabezana neemfuno zamanye amafama amatsha.
Ngaphezulu, isebe lezolimo, inguqu kwezomhlaba nophuhliso lwasemaphandleni licwangcise isixhobo senkxasomali esihlanganyeleneyo seenkonzo zemali necandelo lamashishini ezolimo. Iya kuba yintsika engaphezulu ekhusela ngaphezulu eli candelo nokubonelela ngezixhobo eziyimfuneko zokwanda.
Ngaphezulu, imingeni ejamelene namashishini ezolimo namafama iyafana. Ezi zinto kwakhona ziqondwa kakuhle ngurhulumente nangabanebango bamashishini ahlukeneyo. UMzantsi Afrika ufuna isicwangciso sokusebenza, ingakumbi ekuphuculweni kobuchule kumashishini ezoqhagamshelwano, ekwenziweni kweenkonzo zoomasipala, ukusiphula nengcambu inkohlakalo kunye notshintsho lwemithetho kwisebe lezolimo, inguqu kwezomhlaba kunye nophuhliso lwasemaphandleni.
Isicwangciso esikhulu iAgriculture and Agro-processing Master Plan sandlala isikhokelo somgaqonkqubo onika imbono ebanzi yemingeni yecandelo size sicebise ngezinye izisombululo. Ayisosicwangciso sigqibeleleyo, kodwa singakwazi ukuphucula imiqathango yokusebenza kwecandelo ukuba siphunyezwe kakuhle nangobuchule ngabo bonke abanebango. Njengoko ezolimo zilelinye lamacandelo aya kunceda ekukhuliseni uqoqosho lwaseMzantsi Afrika, makwandiswe ingqwalaselo kwiinguqu eziyimfuneko ukuvulela ukukhula nokudalwa kwemisebenzi.
- UWandile Sihlobo ngusoqoqosho oyintloko weAgbiz nombhali wencwadi ethi “Finding Common Ground: Land, Equity and Agriculture”. Iingcamango neembono ezivakaliswe kweli nqaku zezo zombhali yaye azibonakalisi ncam iimbono okanye izigqibo zeFood For Mzansi.
KWAKHONA FUNDA: Indlela yokuba ngumfama omkhulu wesizukulwana sokuqala
