Isosha elisebenzela umbutho wezokuVikela eNingizimu Afrika osekumsize wafunda ukuthi awukwazi ukuvele uliphonse ithawula. Lo mqondo usiza noMnuz Phakade Khanyile epulazini eMpumalanga lapho esebenza khona noyise.
UKhanyile oneminyaka ewu-41 uneminyaka engaphezu kwewu-20 emasosheni. Ngaphambi kokujoyina umbutho wokuvikela waqeqeshwa iminyaka emibili ukuze akulungele ukuba yisosha.
“Kukhona konke okwenzayo, zimisele,” usho kanje exoxa neFood For Mzansi.
Ukuzimisela kwakhe kubonakala nangokuthi akasebenzeli nje izwe lakhe embuthweni kuphela kodwa nakwezolimo. Eminyakeni eyisithupha edlule waqala ukusebenza noyise onepulazi elidayisa izinkomo, izimvu nezitshalo.
UKhanyile uqale ukufuya izinkomo zamaNguni
“Ngikhethe izinkomo zamaNguni ngoba ngizama ukukhulisa umhlambi okuzothi ngomuso uthathwe njengowekhethelo,” usho kanje. Izinkomo zakhe uzifuye emhlabeni ongamahekthare awu-200 awuqashe emphakathini onomhlaba ongamahekthare awu-1 800.
UKhanyile uphumelele ukuthenga izinkomo zamaNguni ngo-Okthoba wango-2019 ngesikhathi ethenga izinkomo ezinhlanu ezimithi.
“Ngiyohlale ngibabonga labo abangeluleka ukuthi ngiqale kancane futhi ngigxile ekwenzeni umsebenzi onehlonze. Ngikholwa wukuthi ukuthenga izinkomo zekhethelo kanjalo nokuphatha ngendlela efanele kuwukhiye ebhizinisini lokufuya,” usho kanje.
Uma kwenzeka ezithola enemali ethe xaxa, ubevele athenge ezinye izinkomo.
Ipulazi likaKhanyile lise-Amersfoort, indawo engamahora amathathu uma usuka ePitoli. Umhlambi wakhe usunezinkomo eziwu-42 kanti kukhona umuntu amqashe ngokugcwele ozigadayo izinkomo zakhe uma esuke etshalwe kwenye indawo wuMbutho wezokuVikela.
Ubuhle bezinkomo zamaNguni
Uthi wazikhetha ngamabomu izinkomo zamaNguni ngoba “zinakekeleka kalula nangenxa yothando.”
UKhanyile uthi izinkomo zamaNguni zikwazi ukukhula nokuphila noma ngabe yikuphi eNingizimu Afrika. Azidingi ukunakekelwa kakhulu futhi azinazo nezindleko ezinkulu zodokotela.
Uthi ziyazala kakhulu futhi azinalo ulaka okwenza kube lula ukuzigada futhi kunciphisa namathuba okulimala.
“Ngiyazithanda ngoba yizinkomo ezinhle nendlela ezixube ngayo imibala kanjalo nezimpondo zazo ezinhle. Izinkomo zobabamkhulu kusukela emandulo. Kunesisho sesiZulu esithi ‘inkunzi isematholeni’ esisho ukuthi intsha ngabaholi bakusasa. Ngibona ukuthi abalimi abasafufusa njengami bahlalelwe wumsebenzi wokuqhubeka nokufuya izinkomo zamaNguni ukugcina ukuze izizukulwane ezizayo zazi ngomlando wethu. Angikwazi ukuchaza indlela engizizwa ngayo uma ngiseduze kwazo,” kusho uKhanyile.
Usebhalise kwiKaonafatso ya Dikgomo Scheme esiza abalimi abasafufusa bathole amathuba atholwa ngabalimi abakhulu futhi isebenzisana ne Agricultural Research Council. Uthi lokhu “kuyangisiza ngigcine amarekhodi okuthi umsebenzi uqhubeka kanjani, ngibone ukuthi yiziphi izilwane ezisebenzayo futhi ezingenisa inzuzo.”
“Ngizimisele ukuba nomhlambi wezinkomo eziwu-100 eminyakeni emihlanu ezayo. Ngifuna ukuphucula uhlobo lwezinkomo engizidayisayo, ngidayise izinkomo ezinhle,” kusho uKhanyile owengeze ngokuthi ukuba nezinhlobo ezihlukene yikona okumise ibhizinisi lakhe.
“Izinkomo zamaNguni yizona zinkomo okwazi ukuzixuba uma uzizalanisa. Azizona izinkomo ezinkulu okutheni kodwa azijwayelekile izinkinga uma zizala ngisho kusho ngabe ingakanani inkomo ebisetshenziswe.”
Iqhinga likaKhanyile lokwandisa umhlambi wakhe
UKhanyile uyathemba ukuthi iqhinga alisebenzisayo ukuzalisa nokwandisa umhlambi wakhe lizomsiza agcine enezinkomo eziwu-100 singakapheli leesi sikhathi azibekele sona. “Nginesikhathi lapho ngizalisa khona, ngibeka inkunzi ngoJanuwari nangoFebhuwari. Amathole azalwa ngo-Okthoba nangoNovemba. Ayeka ukuncela ngoMeyi nangoJuni. Izinkomo ezingamithi ziyahlinzwa ngoba umhlambi muncane ukuthi ungathwalana nezinkomo ezingazali.”
Indlela ondla ngayo izinkomo zakhe nokuqinisekisa ukuthi zinohlonze ilula.
“Ngizinika i-phosphate lick ehlobo ne-maintenance lick phakathi kukaMeyi no-Agasti lapho ngisuke sengishintsha i-production lick kuze kube notshani oluhlaza. Umhlambi wami aziwudli utshani nezinsalela zezitshalo lezi ezithukuswayo ukuze zondle izinkomo ebusika,” usho kanje.
“Eminyakeni eyishumi ezayo ngithemba ukuthi ibhizinisi lami liyobe selisimeme futhi linomhlambi omuhle owaziwayo ukuthi unehlonze.”
Nanka amathiphu uKhanyile awapha abalimi inkonyane esathuka isisinga kubo:
- Yenza ucwaningo.
- Ungazithathi izindlela ezinqamulelayo.
- Thenga izinkomo ezinohlonze ngoba lokho kuzokusiza ngokuhamba kwesikhathi.
- Indlela ibuzwa kwabaphambili.
- Okokugcina, kuqikelela ukuthi unamabhuku obhala kuwo yonke into.
FUNDA FUTHI: I-KZN inezinhlelo ezinkulu zabalimi abafuyile
Yiba yingxenye ye-Farmer’s Inside Track: Yiba ngomunye wabantu abathola izindaba zekhethelo ngabantu abafikayo embonini yezolimo, ama-newsletter nama-podcast.
