Impilo kaMnuz Sizwe Mchunu isishintshe kaningi kusukela ekufundeleni ezobuchwepheshe, ukungena emculweni waba nguDJ kodwa uthando lwakhe lwezolimo oselushintshe impilo yakhe.
UMchunu odabuka eVolkstrust, esigodini esisenhla neLaing’s Nerk Pass, KwaZulu-Natali, uthi ukuze uphumelele kwezolimo, kudingeka ucijelwe ukuwenza lo msebenzi.
UMchunu ukhiqiza amaveji epulazini likamalume wakhe eliyihekthare eMpumalanga.
Ekuqaleni, abazali bakhe bamkhuthaza ukuthi enze izifundo zobuchwepheshe bamakhompyutha kanti wagcina enze i-systems development eBerea Technical College eseKZN.
“Nokho, angizithandanga. Ngafela ngaphakathi ngonyaka wokuqala nginethemba lokuthi ngizozithanda kodwa ngonyaka wesibili kwakunzima kakhulu, ngagcina ngishiya phansi,” kusho yena.
Kufanele uzazi ukuze uthuthuke
UMchunu udlule eBoston College lapho enze khona izifundo zokudidiyela nokubhala izingoma, into ayithanda kakhulu. Eseqedile usebenze iminyaka emithathu engu-DJ, umdidiyeli womculo, eshayela izimoto ze-Uber futhi edayisa.
Kusuka ngo-2016 kuya ku-2021 usebenze esitebeleni somculo esaziwayo iSoul Candy Institute of Music. “Ngisakwezikaqedisizungu, bekunzima ukubeka imali. Ngihlangane nosaziwayo abaningi kodwa akungingeniselanga imali,” kusho yena.
UMchunu ukhulele eKZN naseMpumalanga, kusukela esafunda kwaze kwaba uyasebenza.
Eqala ukukhiqiza amaveji ngo-2021, ubesebenzela eBethal, eMpumalanga, ebambisene nowayengumlingani wakhe ebhizinisini kwaze kwaba wuJanuwari wonyaka odlule.
Ucilo uthuke uzishaya endukwini
Esacijelwa umculo, impilo yakhe yashintsha mhla ehlangana noMnuz Nkosinathi Dlamini owayesebenza kwiGagasi FM, ongasekho emhlabeni. Ngesikhathi bexoxa, wamtshela ngothando analo ngezolimo.
Uqale ukulima epulazini likaDlamini eliseGingindlovu, idolobha elisoThungulu, KwaZulu-Natali. Kusukela ngoFebhuwari kuze kube ngu-Agasti ngonyaka odlule, ubelime amaveji emhlabeni abengawukhokheli.
“Ubaba uDlamini wangeluleka ngokuthi ngilandele okusenhlizweni yami. Ukufisa kwakhe ukungisiza kufakazelwa nawukuthi wangivumela ukuthi ngisebenzise umhlaba wakhe ongamahekthare ayisihlanu.”
Ngakolunye uhlangothi, umalume kaMchunu, uMnuz Musa Nyembe uqashisa ngamahekthare ayisishiyagalombili epulazi afuye kulona imfuyo eMpumalanga.
UMchunu uthi wathola ithuba lokuphindela ekhaya ayosebenza epulazini likamalume wakhe eCharleston. Uqhubekile nokutshala u-anyanisi, iklabishi, upelepele, i-kale, ispinashi, u-beetroot, u-lettuce ne-cauliflower akutshale kuleli pulazi elingamahekthare awu-10, kodwa yena ulime ihekthare elilodwa okwamanje.
Amakhasmende akhe abanikazi bezitolo zendawo, abadayisi abasemgwaqeni, uSuper Spar eVolkstrust, uBoxer waseMiddelburg nomphakathi wasemalokishini iCharleston neVukuzakhe.
UMchunu uthi uyaziqhenya ngokukhetha ezolimo kunodumo nezomculo. Uyaqonda ukuthi ngezolimo utshalela futhi uhlelela ikusasa lakhe.
Izinhlelo aphezu kwazo
Ulwazi analo manje elokukhiqiza amaveji, ukuphatha ipulazi nokukhiqiza umkhiqizo wommbila, uzimisele ukuwandisa amakhono akhe.
“Ngabona umfundaze kuFacebook. Ngafaka isicelo ngoba ezolimo yinto ebengihlale ngifuna uikuyenza. Ngifunde eBuhle Farmer’s Academy eDelmas, eMpumalanga, lapho ngifunde ngokukhiqiza amaveji kanti uhlelo lonke lwaluxhaswe yiSasol.”
Uthi kwamjabulisa kakhulu ukuthi abafakwanga esikoleni sezolimo ukufunda ngokulima kuphela kodwa iSasol yabasiza ngokubaxhasa ngoR40 000 wokuqala umsebenzini. Ukholwa ukuthi imali ibaluleke kakhulu kwezolimo. Kwathiwa abahambe bayothola ukuthi izinto abazidingayo zibiza malini.
Uhlu lwakhe lwalunamathangi amathathu amanzi, iziphehlimandla, amapayipi, ucingo lokubiya, izibonda zokubiya, izibulalimagciwane, wumanyolo, ifosholo, amabhala, namanye amathuluzi okukhiqiza amaveji.
Luvutha bhe uthando
UMchunu akazukugcina ngokutshala; usekhiqiza i-chilli sauce futhi uzimisele ukugxila ekuguquleni umkhiqizo wezolimo ngomuso. Uzibona ekhula amakhono akhe ngokusungula impuphu yakhe neminye imikhiqizo yezolimo.
Uthi ukuhlala entweni eyodwa kwenza umuntu agcine ebamba eyeka kanti uthi ukuze ukhue kufanele sonke sikwazi ukwamukela ukushintsha kwezinto empilweni.
OKUNYE ONGAKUFUNDA: Kungenzeka iSaudi Arabia iqale ukuthenga inyama ebomvu eNingizimu Afrika
Thola izindaba ngabaletha ushintsho: Izindaba ezigqugquzelayo ngabondla uMzansi.
