Unkinkishombane awukhokeleli nje kuphela kwilahleko yezemali enkulu koosomashishini baseMzantsi Afrika, kodwa kwakhona ufaka igalelo ekuthini ukutya kungaqoqoshwa. UMzantsi Afrika kunokwenzeka ukuba ufumane ukumka kombane okungaphezulu njengoko uEskom ezama ukufezekisa utshintsho nokubuyisela ulawulo kunkinkishombane.
Kukho ukwanda kokulahlwa kokutya xa kusenzeka unkinkishombane ngenxa yezizathu eziliqela ezahlukileyo. Amacandelo efriji ayayeka ukusebenza, izitovu zokubhaka zingasebenzi, amacandelo okuveliswa kokutya ema ngxi, zize nezilwanyana zasefama zibulaleke bubushushu.
Umbane ubalulekile kuzo zonke izigaba zomjikelo wokuveliswa kokutya; ngaphandle kwawo ukutya kuyonakala kunyanzeleke ukuba kulahlwe.
Ukucima kombane kudla imali eninzi
Loyiso Basso waseMakhaya eKhayelitsha eNtshona Koloni, uthi unkinkishombane kunempembelelo enkulu kwishishini lakhe, KwaMgoli Fast Food. Uthi usebenzisa izinto ezisebenza ngombane ukufraya nokuthowusta izidlo ezikhawulezayo zakhe.
“Xa kusenzeka unkinkishombane, iiyure ezimbini okanye ukuya kwezine ishishini lam liyema ngokunjalo.”
He adds that the only method that works for him to prevent food deterioration is ordering cold meats and veggies in little packets.
Wongeza ngelithi eyona ndlela emsebenzelayo ukuthintela ukonakala kokutya kukuodola iinyama ezibandayo nemifuno ngeepakethi ezincinane.
“Ndinethamsanqa ukuba ndihlala kufutshane neevenkile apho ndifumana khona i-inventri yam. Ngoko ke ndiye ndistokhele usuku olo. Oku kuyadinisa, kodwa yindlela endinokuyisebenzisa.”
Kutshanje, uzifumanele ipani lokufraya elisebenzisa irhasi, abanga ukuba kubiza kakhulu ukuyisebenzisa ngenxa yamaxabiso erhasi anyukayo. Nakuba kunjalo, unako ubuncinane ukuthengisa iitshipsi zeetapile ngethuba lokumka kombane.
‘Unkinkishombane luyabacaphukisa abathengi’
USiyanda Jayiya, ngumnini wemisitho wenkampani i-SJ, ucacisa ukuba ukuphulukana kwakhe nengeniso ngoku kubangelwa yilahleko yoveliso, njengoko abasebenzi bengasebenzi ncam ngethuba lonkinkishombane.
“Akukho nkqu neshishini elincinane elikwaziyo ukufikelela koovimba bombane abangabanye. Nje kuphela ngoocimicimi bombane benqanaba lesi2 kwiiveki ezidlulileyo, uMzantsi Afrika wenze ibango lokuba uphulukene neR2 yeebhiliyoni.”
Unovakalelo lokuba nje ukuba eve amagama aphathelele kunkinkishombane, akakwazi kuzinceda koko uziva edakumbile yaye ecaphuka, ingakumbi kumashishini afumaneka emakhaya okanye kwizakhiwo ezingenabo abanye oovimba abanjengejenereyitha okanye isistim esebenzisa isola yesizwe.
“Unkinkishombane lunokukhuthaza ulwaphulomthetho kuba iialam ezilumkisayo xa kuqhekezwa ziye zingasebenzi okanye zingakwazi ukusebenza ngokwamanqanaba afanelekileyo, lushiye amashishini esemngciphekweni wobusela kunye nezinye izenzo zolwaphulomthetho.”
Uthi ngethuba lonkinkishombane, amashishini amancinane aphulukana nemali kuba kwiimeko ezininzi, efuna Amandla ombane ukusebenza nokuqhubeka nakwenzayo.
Umngeni wokuqhuba ishishini lokutya
“Igesi ibisoloko inguvimba wokupheka endimkhethayo, njengoko yayifikeleleka kakhulu kwixesha elidlulileyo. Nakuba kunjalo, igesi ngoku ixabiso kakhulu nayo yaye izinto zokubasa ngokunjalo zixabisa kakhulu,” utsho uLiziwe Matloha, oyishefu, umhleli wezidlo, umbhali weencwadi zokupheka, umnxibelelanisi-zibhrendi, umsindleki weeklasi zokupheka eziqhubekela eBoksburg, Ekurhuleni.
“Asinayo enye indlela, kodwa siseyivela ukuthenga ijenereyitha yeshishini ukwenzela ixesha elizayo.”
Oku, uyakholwa ukuba, kuya kugcina ishishini lisebenza ngokupheleleyo nkqu nangethuba lonkinkishombane. Nakuba kunjalo, njengeshishini elincinane akazange afumane nzuzo kunyaka ophelileyo, ngoko ke ukufumana imali yenkxaso yazo zonke ezi zinto zibubunewunewu zokusebenza kuye kwangumngeni.
“Omabini amakhitshi am, elam labucala nestudiyo sekhitshi leshishini lam anezitovu zegesi, kodwa iioveni zezombane zona. Le yeyona nto inzima kakhulu ngethuba lonkinkishombane.”
Ngokubhekisele kwiiklasi zokulungiselela ukutya zakhe, uthi zonke izinto zokusebenza ekhitshini zisebenza ngombane. Ngenxa yoko, kufuneka ezinqumamisile iiklasi ezininzi zakhe, nanto leyo icaphukisayo netya ixesha.
“Unkinkishombane lufuna amaxesha okunqumama amade, ngethuba leeseshoni zokupheka. Oku kuxabisa kakhulu epokothweni ngokunjalo. Kufuneka sichithe imali ekusebenziseni ezinye iindlela, yaye abanye abantu ngokulula nje bamathidala ukuqonda, kodwa akukho nto sinokuyenza ngaloo nto,” ucacisa atsho uMatloha.
Intlekele yokulahlwa kokutya
Ingcali yezokhuseleko lokutya, uNjingalwazi Lucia Anelich, uthi ukonakala okubangelwa ziimayikhrobhu zokutya okuphekiweyo kunye nako nakuphi na ukutya okuphekiweyo okungumbeko kungazibonakalisa njengokutshintsha kombala, ngenkangeleko enembunembu ebonakalayo okanye ngomngundo okhulileyo nodla ngokukhatshwa livumba elibi. Ngoko ke, kona kona umntu ebeya kuzikhwebula ekutyeni oku kutya.
Wongeza athi, ezinye iimayikhrobhu, ezibizwa ii-“pathogens” (“izibangelizifo”), zinako ngokunjalo ukwenza ukutya ukuba kungakhuseleki ukuba kutyiwe.
Ngelishwa, ukukhula kwezibangelizifo amaxesha amaninzi akubangeli kutshintsha kwinkangeleko, kulwakhiwo, kwivumba okanye kwincasa yokutya, ngoko ke ubani kunokwenzeka ukuba atye agule emva koko.
“Ukutya okuphekiweyo, nakuba kunjalo kudla ngokuba semngciphekweni wokonakala, ukuba ngaba awusulelwanga zizibangelizifo emva kokuphekwa kwako kufakwe efrijini okanye kufrizwe kamsinyane.”
Ukufaka ukutya efrijini nokukufriza zisezezona ndlela zibhetele kakhulu
UAnelich ucacisa ukuba iimayikhro-oganizim zikhula ngokukhawuleza ngaphandle efrijini yaye ukutya okuphekileyo kuya kukhawuleza konakale zingadlulanga iiyure zokuphekwa kwako ukuba akufakwanga frijini kamsinyane, ingakumbi ngethuba leenyanga zehlobo zethu eMzansi, ezishushu kakhulu.
“Ukufakwa kokutya efrijini nokukufriza zisezezona ndlela zimbini zibhetele zokugcina ukutya amathuba exesha elide, kuze ukufakwa kokutya kwifriza kube nelona xesha lokuhlala kusebenza ithuba elide kunelo lokufakwa kwako kwifriji.”
Ukufumana iziphumo ezibhetele kakhulu, iifriji kufuneka zibekwe kumlinganiselo olingana okanye onganeno kumaqondo amane eSelsiyasi, ucebisa atsho. Nakuba kunjalo, ukutya okuphekiweyo okuza kuphekwa zingadlulanga iiyure ezimbalwa, kufuneka kugcinwe kushushu ngaphezu kwamaqondo angama60 kuSelsiyasi. Esinye sesaci esimalunga nokhuseleko lokutya “kukugcina ukutya okubandayo kubanda”, “nokugcina ukutya okushushu kushushu”, uqukumbela atsho.
FUNDA OKU Ukuvuna mhla kutshisa ilanga? Iingcebiso zokukhusela ulusu
