Uzimisele ngokufinyelela esicongweni umfuyi waseVryburg, eNorth West, uMnuz Boikanyo Christopher Melamu. Kodwa akafuni ukukhuphuka yedwa. Ukucathulisa abantu nokufundisa amakhono yinto ayikhonzile futhi akakunqeni ukwabelana ngolwazi analo ngoba ufuna wonke umuntu aphumelele.
UMelamu odabuka eLamus Bonsmara ngasesigodini saseDithakwaneng akamusha kwezolimo. Uneminyaka engaphezu kwewu-20 ewumlimi kanti uyayithanda kakhulu imfuyo.
UMelamu unamapulazi amabili, elilodwa elingamahekthare awu-1 200 eReivilo kanti elinye lingamahekthare awu-1 958 eNilsne. Uwumlimi ozalanisa izilwane obhalisiwe ngokusemthethweni.
Uqale kanjani
“Ngaqala ukuba wumlimi ngisemncane. Ngikhuliswe emndenini wabalimi kwaze kwaba kuba phakathi kweminyaka yo-2000 ngesikhathi nginquma ukuzimela.
“Ngaqala ngezinkomo ezinhlanu. Ngangisebenza ezimayini, ngonga imali ukuze ngiqale. Kwakungelula ukuthi ngifinyelele lapho ngikhona. Nokho, ukuzikhandla nokuzinikela yikhona okungimisile,” usho kanje.
UMelamu unomhlambi wezinkomo eziwu-350 futhi uzimisele ukuwandisa. Uthi ukufuya kubalulekile ezweni ngoba abazalanisi izinkomo kuphela kodwa badayisa nenyama yenkomo.
Uqashe izisebenzi eziyisithupha ezisebenza ngokugcwele kodwa angathanda ukusandisa lesi sibalo ukuze izinto zibe lula kulaba abaqashile.
“Abanye abantu bathi nginezisebenzi eziningi kodwa ngiyaye ngiphendule ngokuthi ‘cha, ngidinga ezinye’. Ngifisa ukubaphungulela umsebenzi futhi ngizisize.
“Isifundo esibalulekile engisifundile ngempilo wukuthi kufanele wabelane ngolwazi onalo usize abanye abantu nganoma ngabe iyiphi indlela.”
UMelamu uthi nabantu abaningi abamcathulisile futhi bamululeka ohambweni lwakhe nabakhumbulayo.
“Ngeke ngikhulume ngomuntu oyedwa noma ababili, baningana. Ngiyilolu hlobo lomumntu olubuza abantu abaningi kuye nesimo engizithola kuso. Kuyasiza futhi ngoba indlela yokwakha ubudlelwano nabantu abaningi wukuxoxisana nabantu abahlukene.”
Uyazibuthela imiklomelo
“Wuhambo olube luhle kimina ngoba miningi imiklomelo engiyitholile ngenxa yokuzikhandla kwami. Eyokuqala ngayithola ngo-2012 ngesikhathi ngiklomeliswa ngesikhathi ngiqokwa njengomuntu ozalanisayo osafufusa wonyaka kwase kuthi ngo-2016 ngangingomunye wabantu abawu-10 abahamba phambili kwiSouth African Stud Book Elite Awards.
“Ngo-2020 ngawudla umhlanganiso futhi kwakumnandi ukuvuna izithelo zomsebenzi wami. Ukuzikhandla akukaze kubulale muntu.”
UMelamu uthi enye yezinto ezibalulekile ezizoqinisekisa ukuthi ibhizinisi lakho lezolimo liyakhula futhi liyaphumelela wukugcina amarekhodi ezinkomo, imithi nendlela imali esebenza ngayo.
“Kufanele ugcine amarekhodi kusukela ekuzalweni nasekukalweni kwamathole,” usho kanje.
Ukuzama inhlanhla
“Ngaqala ngadayisa izinkomo zami endalini yeG7. Ngaqala ngingomunye wabadayisi ababefika ngaleso sikhathi ngo-2015. Kuqhubeke kanjalo iminyaka embalwa kwaze kwaba ngizenzela eyami indalo. Kwakungelula kodwa ngakwenza ngoba ngangidinga ukuzimela,” usho kanje.
Ngo-2020 uMelamu ube nendali lapho kwadayiswa khona izinkunzi eziwu-10 kweziwu-26. Ngesonto elidlule ubenendali yesithathu eReivilo lapho bekudayiswa khona izinkunzi eziwu-32. Ugcine edayise eziwu-27.
UMelamu uthi kumqoka ukuthi labo abafikayo kwezolimo bazimisele ukufunda ukuze baphumelele. Ucele abalimi abakhulu ukuthi balekelele labo abasafufusa, babacathulise.
Uyaliphila leli vangeli alishumayelayo njengoba uma usuke engenzi lutho ecathulisa abalimi abawu-13 eDithakwaneng.
“Bengibafundisa ukuthi zinakekelwa kanjani izinkomo. Bengibacathulisa iminyaka emihlanu lapho bengibafundisa khona yonke into abadinga ukuyazi, ukuthi zinakekelwa kanjani izinkomo nokuthi uyihlola kanjani ukuthi imithi yini.
“Ngokwenza njalo, into engijabulisayo wukubona uhlobo lwamathole abalukhiqizayo kanti uma beyodayisa izinkomo zabo endalini, babuya bejabule. Ngalokho ngiyazi ukuthi oyedwa wabo uzokwazi ukubaluleka kokuba
Okumkhuthazayo
UMelamu uthi akubizi mali ukubuza imibuzo. Ukhuthaza abafisa ukungena kwezolimo ukuthi bacwaninge futhi baziqonde lezi zinto eziyisisekelo.
“Akulona uhambo olulula, kunezinselelo eziningi, ngiyakwazi lokho. Kodwa uma uhambo luba nzima, hamba uyocela usizo kuhulumeni. Lungesheshe lufike kodwa bambelela. Asisukumeni sisebenze.”
Uthe nakuba uhambo lwakhe lwezolimo lube luhle, zikhona izingqinamba ahlangabezana nazo.
“Ukuthola umhlaba nemali yizona zingqinamba ezinkulu ezivimba ukuthi ezolimo zikhule ezweni. Ukungabikhona komhlaba ongaphansi kwamakhosi omuhle nengqalasizinda efana nemigwaqo inselelo enkulu.”
Kodwa zikhona noma zingekho izinselelo, uMelamuulungele noma yini.
FUNDA FUTHI: UTshepiso owumelaphi uyazifela ngezolimo
Thola izindaba ngabaletha ushintsho: Izindaba ezigqugquzelanayo ngabantu abondla uMzansi.
