Kunjani ngempela ukuba wumuntu omnyama onomhlaba? Hhayi isiqeshana somhlaba kodwa udedangendlala womhlaba onabele izindawo eziningi? – UDlamini
“Uma ngingathi nginokuthula, angiboni ukuthi ngisho lokho kuchaza ngokwanele,” kusho uMnuz Bongani Dlamini exoxa neFood For Mzansi. “Yindawo enhle futhi inokuthula. Ngingomunye wabantu baseNingizimu Afrika ababusisiwe futhi ngiyazi kunzima kanjani ukuba nomhlaba. Ngihlale ngiwabonga amadlozi ami.”
UDlamini ukhumbula lapho eqhamuka khona ngesikhathi sihlala phansi emotweni yakhe iFord Ranger epulazini lakhe elingamahekthare angu-600 esigodini iSihanahana esiseMkhandlwini uMsukaligwa, eMpumalanga. Liseduze nedolobha i-Amsterdam elisezintabeni zaseMkhondo empumalanga nesifundazwe.
FUNDA FUTHI: Uneminyaka ewu-19 kodwa usengumlimi ofuyile ovelele
Kunezinto ezimbalwa lo baba wezingane ezingu-10 azenzile empilweni ngaphambi kokungena kwezolimo. Uke waba yisosha loMkhonto weSizwe, umbutho wamasosha we-ANC ngesikhathi sobandlululo futhi uke washayela itekisi eGoli.
Uke wazama nokufundisa amabanga aphansi kodwa “Ngabona ukuthi otakalani bafishane kakhulu kanti mina ngangiwuthisha omude kakhulu. Izingane zazimfishane ngisho kunamadolo ami, ngabona ukuthi kuzofanele ngishintshe umsebenzi,” kusho yena ehleka.
“Ngakhetha ukuthuthukisa intsha. Ngabona ukuthi ifuna izinto zenzeke manje.”
Igama lepulazi lakhe iKasthuli Agricultural Services kanti lisuselwa egameni lalowo owayengumnikazi walo kuqala owaziwa ngelikaSthuli endaweni.
Dlamini uthi ukube walishintsha igama, babengadideka labo abase bevele belazi ipulazi. Ufuyile futhi utshale izihlahla. Ugxile kuwatela osetshenziswa ukwenza amalahle. Ufuye izimbuzi nezinkomo ezingaphezu kuka-110 zohlobo lweBeefmaster neBrahman.
“Kuyabanda (njengoba sihlangene). Njengoba sizowela umfula onqamula epulazini likaDlamini, kunezinkomo ezilandela iveni kaDlamini. Uthi izinkomo zihogela iphunga lokudla kwazo akuphethe. “Anginawo amanzi lana. Lo mfula yiwona kuphela engithola kuwo amanzi epulazini,” usho kanje.
Ngale kwezihlahla nemfuyo, wayetshale ummbila kodwa washintshela ekutshaleni utshani obudliwa yimfuyo. “Ngahluleka ngancama ekutshaleni ummbila ngoba anginalo ulwazi nakuba ngikhule ekhaya ngiwutshala. Kodwa kuhlukile lana,” usho kanje.
“Okunye okwakungicasula ukuthi abantu babewuntshontsha ummbila, wawubona abantu bethwele inqwaba yommbila. Into eyayingaze igcine ikwenze ube
nenhliziyo elikhuni futhi ugcine usubalimaza abantu. Ngakho ngabona kungcono ukushintshela ekudleni kwezilwane.”
FUNDA FUTHI: Umlimi oxakwe yisomiso: ‘Ngiphila ngomusa kaNkulunkulu’
UDlamini uqashe abantu abawu-11 abasebenza ngokugcwele epulazini lakhe kanti uyaye aqashe abayitoho ikakhulukazi uma kuyisikhathi sokuvuna, ukuhlakula nokuhlanza amahlathi. Uthi usenikeze izisebenzi eziqashe epulazi amahekthare angu-60 ukuze azakhele imizi nezinto zokuzijabulisa kanjalo nehlathi abazothola kulo izinkuni.
Ukunqoba izingqinamba
UDlamini wathola ipulazi ngo-2010 emnyangweni wokuthuthukisa izindawo zasemakhaya nokuvuselelwa komhlaba eMpumalanga. Waqala wazama ukufuya izinkukhu. Kodwa kwasheshe kwaphela emva kokuthi emadeleni bemoshe izinkukhu zakhe ezingu-500.
“Bahlinza izinkukhu zami bangazifaka efrijini kunalokho bazifake kwi-freezer eyayinamagcinwa. Uma uyipheka yayinephunga futhi yayikhipha igwebu elimhlophe kungathi yonakele. Ngabona ukuthi sidinga ukuba namadela ethu njengabafuyi bezinkukhu abamnyama ukuze engeke enzelwe phansi amabhizinisi ethu.”
Kodwa-ke lokho akuzange kumdikibalise, wadlulela ebhizinisini elilandelayo. Wasebenzisana nomunye umfelandawonye wabalimi basungula omunye umfelandawonye bathola ithenda lokukhiqiza amaveji athengwa yizikole ezingaphezu kwezingu-30 eMkhondo.
Lo msebenzi wachuma kangangokuthi wayebona kahle ukuthi sebewele ngelibanzi. Kodwa uthi kukhona ababenzela phansi ezikhulwini, wawa umsebenzi.
Bathola ukuthi umsebenzi usubaphelele sebefake imali engaphezu kukaR500 000 ebhizinisini. Bazi ngoba sebethi bahambisa ukudla ezikoleni sebethola ukuthi umsebenzi usunikwe omunye umuntu. “Lokhu kwagcina kudala ukungazwani kumalungu omfelandawonye.”
“Angiwathengi amaveji (ezitolo). Uma ufuna inkukhu noma amaqanda, ukuthatha egcekeni. Ngingathatha izinkomo ezintathu ngizisenge uma ngifuna ubisi.”
Ezolimo zidinga isineke
Nokho wavuka wazithatha emva kokuwa okwesibili, ibhizinisi leli elacishe lashabalalisa onke amaphupho ayenawo ngezolimo. Uthe esevuke wazithatha kodwa kulokhu wakhetha ukusebenza yedwa. Lube ngcono uhambo kulokhu kodwa kuningi obekufanele akuqaphele.
“Inselelo enkulu ukuthi udinga ukuba nemali ozoyitshala ngaphambi kokuthi kube khona imali ebuyayo. Kufanele ube nesineke. Ngifike ngo-2010 lana kodwa kuphele iminyaka eyisihlanu ngisebenzisa imali, nginakekela futhi ngitshala epulazini.
“Ikakhulukazi uma ufuna ukulima, kufanele uyazi ngempela into oyenzayo ngoba izinto ezidingakalayo ziyabiza. Kodwa usuwubambe kahle, kuyaqonda konke. Umhlabathi yiwona okulawulayo, wenzani nini, uma uphunyukwe yisikhathi, ngeke ingene imali.”
UDlamini uzithola esekhathele. Sizohlangana nomunye umhlambi wezinkomo bese siyama siwubuke. Usejabule futhi ubuyelwa amandla, uyaphuma evenini yakhe, azishayele ikhwela axoxe nazo. “Nikephi bafowethu, ngingapha mina. Wozani! Wozani! Ziphi izitsha zenu zokudla?”
Ngempela izinkomo ziyasondela ngobuningi bazo ku “baba” wazo. Uyahleka esho ukuthi uzithanda kakhulu kangangokuthi kwesinye isikhathi uyeza nje azozibuka. Izinkomo azisakwazi ukulinda kangangokuthi sezifuna ukudlela evenini. “Yimani kancane, hhayi manje. Ngizonipha ukudla kwenu ezitsheni. Siyezwana angithi?”
FUNDA FUTHI: Ukuzinikela kukaRefilwe kwezemvelo kugqugquzela uthando lwakhe lwezolimo
Ukukwazi ukuthola umhlaba kubalulekile
Njengoba sizishiya izinkomo uthi uyafisa sengathi uhulumeni ubengasheshisa uhlelo lokubuyiselwa komhlaba. Uthi ukuba nomhlaba kubalulekile ukuze ukwazi ukubamba iqhaza emnothweni.
“Emadolobheni amakhulu impilo yimpilo, inqobo nje uma unemali. Uma ngibuka isimo sepolitiki eNingizimu Afrika, akubonakali sizoba nekusasa lapho kunciphe khona ukuntuleka kwemisebenzi. Bayanda abantu abadilizwayo.”
UDlamini uthi uma abantu benganikwa umhlaba owanele lokho kungasiza ukunciphisa ububha futhi kwandise nokudla okunempilo futhi okungafakiwe amakhemikhali.
“Angiwathengi amaveji (ezitolo). Ngithenga kuphela lawo angakhuli kahle lapha. Nginezinkukhu ezingaphezu kuka-50. Uma ufuna inkukhu noma amaqanda, uvele uthathe egcekeni. Ngingamathole cishe awu-25. Ngiyakwazi ukuthatha izinkomo ezintathu ngizisenge uma ngifuna ubisi. Incane imali oyifaka emhlabathini ukuze uzitshalele ukudla kwakho.”
Intsha kwezolimo
UDlamini ufisa intsha ibone ukubaluleka kwezolimo. Uqeqesha intsha afisa ibone ukuthi ingasebenza kwezolimo ibambe iqhaza emnothweni.
Ngo-2018 wathola i-AgriSETA learnership. Uyayincoma i-AgriSETA ngokusungula nokuvulela abanamabhizinisi ezolimo amathuba okuthuthukisa amakhono adingwa yile mboni.
Emva kokuthola i-learnership, uqeqeshe intsha engu-100 eMpumalanga. Kulaba abawu-100, uDlamini ukwaze ukusiza labo abase-Amsterdam eduze kwakhe ukuthi bathole umhlaba abatshale kuwo amaveji.
“Ngaphuma ngingena ngibafunela umhlaba futhi iNational Youth Development Agency ibaxhasile ukuze bakwazi ukuchelela kahle,” kusho yena engeza ngokuthi uyasebenzisana naneSmall Enterprise Development Agency (Seda).
“Yathi iqeda intsha ezigcawini zokucobelela ulwazi, imiqondo yazo yayisivulekile ukuze ibone amathuba akhona kwezolimo.”
UDlamini uthi: “Nganquma ukuthuthukisa intsha ngoba ngabona ukuthi ithanda izinto ezisheshayo, ifuna ukuhlomula manje. Ngibafundisa ukuthi bawulinde umhlabathi ubaphe ukudla. Isibonelo nje, ihekthare elilodwa uyakwazi ukutshala amaklabishi angu-20 000 angabiza uR10 lilodwa. Lokhu kusho ukuthi ezinyangeni ezintathu ungaba noR200 000. Ngizama ukubakhombisa ukuthi bangaphila ngezolimo futhi bathole imali enhle.”
