Kwidolophu yendawo azalelwe kuyo, uDanelene Ruiters uye wangumqondiso wethemba kubantwana babasebenzi basezifama. Xa bemjonga, amehlo abo ayadlamka kuba besazi ukuba kwixesha elisandula ukudlula wayeyinxalenye yabo ngokunjalo.
Owayezalelwe wakhulela kwifama yaseDesperado eWellington eNtshona Koloni, uRuiters uyaluqonda uloyiko lwabo malunga nekamva nemizabalazo yabo yokuphila. Namhlanje, unesidanga sezolimo sokukhulisa iziqhamo (iphomoloji) nokukhulisa iidiliya (ivitikhaltsha), yaye uzinikele ekukhuthazeni isizukulwana esitsha sabantwana babasebenzi basezifama.
“Ndifuna ukuba yinxalenye yeso sizukulwana esiphelisa nya olu hlobo lwengcinga [yokuba ezolimo zezamadoda amhlophe kuphela.] Lolu hlobo lwengcinga oluthi [lusise emva] lusibuyisele umva ngokubhekisele kwezophuhliso nokukhula,” utsho.
URuiters usebenza kwicandelo elingokuthotyelwa kwezemarike eGrowers by Nature, eyinkampani yezemarike nokuthunyelwa kweempahla ngaphandle ezinobungcali kwiziqhamo ezinencindi kunye neediliya zasetafileni. Uye wathi, nakuba kunjalo, waqalisa umsebenzi wezolimo ePerishable Produce Export Control Board (PPECB) phambi kokuba atshintshele kwishishini lokuthunyelwa kweziveliso ngaphandle. Apho, wayesebenzela iinkampani zokuthumela iziveliso ngaphandle ezahlukahlukeneyo, ekhula kwiindima ezahlukahlukeneyo ezaye zamlungiselela ekugqibeleni umsebenzi wakhe awenzayo ngoku.
Eli licandelo elizalise ngamathuba
Ngokungaphandle komsebenzi ofuna okuninzi kuye, uziva enyanzelekile ukuba alungise iimbono nolwazi oluyimposiso malunga nezolimo phakathi kwabantwana babasebenzi basezifama. Abaninzi abakholelwa ukuba ubomi obungaphaya kokusebenza ngezandla bunokwenzeka – yaye ngokunjalo abawaboni amathuba anokufunyanwa ngabantu ababhinqileyo.
Ethethela uFood For Mzansi, uRuiters uthi, “Ngowama2022 akufanelekanga ukuba sibe sisathetha ngokunqongophala kwabantu ababhinqileyo kweli candelo. Abantu abaninzi nangoku [badla ngendeb’ endala] baneenkolelo ezingagungqiyo ngokubhekisele kweli candelo.”
Abantu ababhinqileyo kufuneka baphakame bathathe ngokungenazintloni indawo kwezolimo – nokuba benza ezolawulo okanye ezolimo nokufuya. Eli candelo linamathuba amaninzi ekunokwenzeka ukuba abawazi, kuqukwa nokuthotyelwa kwezemarike kwishishini lokuthunyelwa kweziqhamo kumazwe angaphandle.”
Le nkolo ikhuthaza uRuiters ukuba asebenze okoko ukukhuthaza ingakumbi abantu ababhinqileyo abaselula baseWellington ukuba ngokunjalo nabo benze izifundo zolimo. “Ndigxininisa [kule ngingqi nasezifama] apho ndivela khona ndijolise ingakumbi kwizikolo zasemaphandleni. Andingeke ndilibale apho ndivela khona. Kufuneka ndiphuhlise ndikwaqeqesha abanye abantu abatsha.”
URuiters uthi akakwazi ukungayihoyi imizabalazo yabo. Igalelo lakhe, ukholelwa njalo,” lihamba indlela ende ekuqingqeni ezinye [kwixesha elizayo] iinkokeli zezolimo” ezisuka kwiindawo zasemaphandleni njengezendawo leyo akhulele kuyo.
Eyona nkxalabo yakhe inkulu kukuba kungekho zinkcukacha zaneleyo kwabelwana ngazo nabantu abatsha ngokubhekisele kwikamva lezolimo. “Uninzi lwabantu bethu abanalwazi, kungeso sizathu uya kufumana abantwana abambalwa abangemhlophe abathatha ezolimo njengesifundo sokufundwa. Le ndlela yokucinga ukuba ezolimo nokufuya zezabantu abathile [kuphela] isibuyisela umva.”
Ingaba kukho ikamva ekugcineni iinyosi?
URuiters uthi amaphupha okuba ngumgcinizinyosi oya kuzisa inzuzo ukuya phambili yaye afundise abanye ngobugcisa bokugcina iinyosi. Angathanda ngokunjalo ukubona umhla apho abantu abatsha abaninzi baya kuba nesibindi ngokwaneleyo sokukhetha ikhondo lomsebenzi kwimarike kwanokuthobela uzinzo kwishishini lezokuthunyelwa kumazwe angaphandle kweziqhamo.
Eyona Mpumelelo yakhe inkulu kakhulu ukuza kuthi ga ngoku yaba kukuba ngumntu wokuqala kusapho lwakhe lwabasebenzi basezifama ukungapheleli nje ekuzuzeni isidanga, kodwa kwakhona wangenisa umvuzo njengonesidanga kwezolimo.
“Ndafumana iibhasari ekwakunganyanzelekanga ukuba ndiyihlawule kwiminyaka emithathu endandiyifundile. Kum [ukuba nesidanga] yeyona mpumelelo inkulu. Ndiyakholwa ukuba ndingumhlahlindlela kusapho lwam, kuluntu lwasekuhlaleni nakwizihlobo zam.
“Lonke uqeqesho [iiseshini] nemisebenzi endisoloko ndiyenza [nabantwana basemaphandleni], andiyenzeli kufumana ngqwalaselo kuphela nje kukutyala kwakhona kuluntu lwasekuhlaleni apho ndisuka khona. Ndizenzela eyam imbali. Ndisuka efama yaye ndiyayazi ukuba kunjani ukukhulela apho. Ndifuna ukushiya imbali ekhuthazayo. Njengokuba uMaya Angelou watshoyo, ‘Imbali yakho ikubomi ngabunye obuchukumisileyo.’ Ndisuka emaphandleni yaye ndiyazingca ngaloo nto!”
Okunye ukugqwesa kumsebenzi wakhe kuquka ukufumana imbasa ngomsebenzi wasekuhlaleni wakhe ngowama2019. Oku kumgcina eqhubela phambili yaye umama wakhe, osengumsebenzi wasefama, useyeyona nkuthazo enkulu.
Xa kujongwe kwimva, uRuiters unemincili kakhulu malunga nokukhula ayokufikelela kumandla akhe apheleleyo kwindima yakhe eGrowers by Nature.
“Ndinethemba lokuba yingcali yezolimo ngokunjalo kwanomgcini nomnini weenyosi (apikhaltsharisti) kungekudala, mhlawumbi ndifumane umhlaba ndiqalise ukulima imifuno ekhuliswa ngokwasendalweni nokulima idiliya yasetafileni. Oko kuya kuzisa uvuyo ngokuqinisekileyo entliziyweni yam.”
KWAKHONA FUNDA MALUNGA NOKULANDELAYO: Umfama wespinatshi ufumana intuthuzeleo ekusebenzeni ngomhlaba
Fumana amaBali amalunga noTshintsho: Amabali akhuthazayo asuka kubantu abondla uMzansi.
