UTumi Moleko-Nkomo usebenze kwishishini likamabonakude elona xesha lakha lalide kakhulu. Kodwa ithe yakuhlasela iphandemikhi yeKhovidi19, umsebenzi weli nina waphela nya. Wanyanzeleka ukuba ajonge kwezinye iindlela zengeniso waza wagqiba ekutshintsheni intshisakalo yakhe yokwenza izinto ezimnandi ngomya ibe lishishini.
“Ithe yakuhlasela iKhovidi, iimveliso zema ngxi ke akwabikho nto ininzi iqhubekayo. Ndandikruquke kakhulu kuba ndingumntu othanda ukuhlala exakeke kakhulu,” uMoleko-Nkomo uyakhumbula. Uqalise ukucinga ngezinto akonwabelayo ukuzenza ukugcina ixesha lakhe limaxhaphetshu.
Kuye kwathi qatha kuye ukuba udla ngokwenza izinto ezimnandi ezenziwe ngomya ezenzela izihlobo kunye nosapho lwakhe, yaye oko kwenza izinto ezimnandi ngethuba lesiganeko esidala uxinzelelo esinjengephandemikhi kwanceda abantu abaninzi ekuthomalaliseni inkxalabo yabo.
“Inkxalabo yokungazi ukuba kuqhubeka ntoni okanye yintoni eza kwenzeka … abantu bephulukana nezinto. Kukhangeleka kubanceda kwinkxalabo yabo kunye nokuthomalalisa iingcinga kwanokuzenza zingabi mandundu.”
Umthetho ongokuthengiswa komya neziveliso ezixutywe nomya usenziwa. Kungeso sizathu sokuba, xa uMoleko-Nkomo wagqiba ukuba ufuna ukuthengisa iziveliso zakhe, umntu awaye wacinga ngaye kuqala yayiligqwetha lakhe.
“Ndangena kwi-intanethi ndenza uphando oluncinane. Ndaye ndaqonda ukuba akukho nto ininzi ngokungqinelana nommiselo kwanokuba urhulumente uyacotha ukuyisebenza nayiphi na into enxulumene nomya. Ndaye ndathetha ke ngoko negqwetha lam. Wasuka wathi, ‘heke, la ngamanyathelo alandelana nalo mba. Akacaciswanga ngokuthe gca.”
Ingaba inikwa njani inkxaso kwishishini lomya?
UMoleko-Nkomo ngumnini we-iCanna, elishishini lezinto ezityiwayo elikwi-intanethi apho athengisa khona iiti ezixutywe nomya, izinto ezibhakiweyo namayeza anealkhoholi. Umya uwufumana kumlimi wawo oneempephamvume, aze athumele isiveliso sakhe kwizwe lonke.
“Andizikhuliseli ngokwam umya kuba ndihlala kwindawo enezakhiwo ezixananazileyo. Andinayo enyanisweni indawo evuleke ngolo hlobo. Kodwa ndisebenzisana nomlimi womya oseBrits. Qho ngeveki, uzisa oko ndikufunayo ukwenzela ukuba isiveliso sithengwe, nento esoloko incinane kunoko ndikufunayo kanye. Sihlala kummiselo ongadlulanga kwi1.2kg.”
Ngaphandle komqathango wezokuvelisa, uMoleko-Nkomo uthi eminye yeyona mingeni mikhulu yakhe kukunqongophala kwenkxaso yemali. Umthetho ongacaciswanga gca ngokuphathelele kumya kunye neembono ezingolondolozo lwendalo ezingababandakanyiyo oosomashishini bomya kwinkxasomali yesiqhelo.
“Ndineembono ezininzi kakhulu ngendlela ebendingathanda ukulikhulisa ngayo eli shishini nalapho ndinqwenela ukulisa kulo. Kodwa kuxabisa kakhulu ukulakha. Ukususela kumagqwetha ekufuneka ndibe nawo, ukuya kwipropati. Yonke le setaphu yayo ngenene, ngenene ixabisa kakhulu.”
Omnye umngeni awuchazayo uMoleko-Nkomo kukuba umthetho ongacaciswanga gca ngokumalunga nomya wenza ukuba ishishini lomya lingakhuseleki. Uthi ukususela oko wayeqale ishishini lakhe, ufumene ukuhlutshwa ngabantu, kodwa akakhange abe nako ukuyokuchaza emapoliseni.
“Abantu abayiqondi ukuba umya asiyiyo laa nto unokusuka nje uyilime kwisiqendu somhlaba osemva kwendlu. Enyanisweni uluhlobo lokuphila ngokwendlela yokuphila. Sisityalo esinamandla kakhulu, kodwa abantu basadla ngendebe endala ngokubhekisele kwizimvo abanzo ngawo umya.
“Ngoko ke kunzima kakhulu ukuchaza ezinye zezinto ezenzekayo. Urhulumente [kufuneka] alungise ukwenza kwakhe yaye enyanisweni abeke umthetho ocace gca owenzelwe abathengisi bomya kunye nabantu abanjengam abenza iziveliso ezininzi kakhulu ngomya. Ukuba kukho umthetho ocace gca, sifumana ukukhuseleka ngaphezulu. Ngoku, sibhenguza nje emoyeni silindele abantu ukuba bazi ukuba benza ntoni na.”
Ukudala ishishini elibandakanya bonke abantu
Ngaphandle komthetho ongacaciswanga gca, ishishini lomya laseMzantsi Afrika liyakhula. Nakuba kunjalo, uMoleko-Nkomo uthi eli shishini sele ilishishini elibabekela bucala abantu abamnyama. Iindleko zokuqalisa ezinyuke kakhulu zisebenza njengesithintelo sokungena ebantwini abaninzi.
“Le nto yenza ukuba kube nzima kubantu abangasuki kwiintsapho ezifumileyo, okanye abasuka kuhlobo oluthile lokuba neqhuzu, ukuba bakwazi ukungena kweli shishini bekwenza oko kwinqanaba abakulo. [Izinhanha] zikwazi lula ukuhlawulela ezo mpephamvume zixabisa kakhulu.”
Eli nina lithi uninzi lwabaninimashishini omya abamnya ngoku ajonge kwiindlela zokumisela ishishini elibandakanya bonke abantu, eliyingalo elawulwa ngabamnyama, nanto leyo avuyelayo ukuyibona.
“Njengokuba izinto zinjalo ngoku, abantu ababenako ukuthenga ezi mpephamvume nabazifumana kwangexesha ezi mpephamvume, phambi kokuba siqaphele oko kuqhubekayo, baphambili kakhulu yaye sele bemanyene ngoku. Yaye asinayo enye indlela ngaphandle kokuba senze eyethu into. Ngoko ke, uvakalelo lobunye lukhona ngaphakathi kwabathengisi bomya abamnyama, yaye ndiyakubulela oko.”
Fumana amaBali amalunga noTshintsho: Amabali akhuthazayo asuka kubantu abondla uMzansi.
