Umpheki uNkk Farzana Alvarado ukholwa ukuthi konke ukudla kwesinto kunomlando ocebile nendaba ekufanele ixoxwe “ngemvelaphi yakho, indlela okuphekwa ngayo nanendlela okuhlanganisa ngayo abantu”.
Uthi isiko linesandla esikhulu endleleni apheka ngayo futhi akagcini nje ngokusebenzisa ithalente lakhe ekhishini kuphela. UNkk Alvarado uwumpheki, ubhala ngokudla, ululeka ngokupheka futhi unezinkonkondlo azibhalile ezishicilelwe.
IRESIPHI: Isishebo sama-prawn esenziwa umpheki uZana
UNkk Alvarado uyakhumbula kuphela amahora bepheka nonina nodadewabo. Kwakumnandi kakhulu uma bebhakela imikhosi yezenkolo efana no- Eid-al-Fitr, “Idili lokuphuma ebhandeni lokuzila” elidliwa ngamaMasulumane emhlabeni wonke, uma ephothula inyanga engcwele kade esebhandeni.
“Ngangihlala kuze kube isebusuku ngihlobise amakhekhe ngoshokoledi ngisebenzisa uthi lokuvungula ukuze kuzokwenzeka kahle ngobunyonico,” kusho yena.
UNkk Alvarado ukuthande kakhulu ukudla ngesikhathi ehamba edla izinhlobo ezihlukene emadolobheni awu-69 ase-Europe. Uzalelwe wakhulela eThekwini, KwaZulu-Natali. Selokhu kwathi nhlo uNkk Alvarado uyazifela ngekhishi. Uthi waqala ukupheka kakhulu ekhaya lakhe, ehlola izinhlobo ezihlukene nezindlela zokupheka, ngenkathi ephucula ubuciko bakhe.
Uqhubekile nokuphucula ithalente lakhe ekhishini. Omunye umuntu omkhulisile ngokupheka umkhulu wakhe ongasekho uMnuz Ebrahim Roshee
“UPapa wayezifundise yena ukupheka. Wayephekela imicimbi emikhulu futhi enekhono lokupheka ukudla okuthandwayo njengobiryani nekayla (umhluzi oshubile obabayo ophekwe ngesiklabhu noma inkukhu) emabhodweni amakhulu phezu komlilo wezinkuni.”
Ekhumbula ukudla okwakuphekwa uyisemkhulu uthi “Ngisayi ngane ngangidonswa iphunga lokudla nendlela okwakusuke kuhlanganiswe ngayo izithako nezinongo.”
Esewumuntu omusha uNks Alvarado wayechitha isizungu ngokupheka esiza ngokupheka emicimbini yomndeni wakhe. Emva kokuphothula uMatikuletsheni eResevoir Hills Secondary eThekwini wabhalisela ukwenza izifundo zobummeli eNyuvesi yase Natali (esibizwa ngeNyuvesi yaKwaZulu-Natali). Umsebenzi angahlalanga kuwona. “Ngiyiciko elithandayo ukusebenza ngezandla, kanti ukuba wummeli kwakungeke kukufeze lokhu,” usho kanje.
Ngabe sengenza izifundo zePublic Relations and Marketing, ngaziphasa ngamalengiso iBachelor of Technology in Communication Science. Ngisebenzele izinkampani ezinkulu emhlabeni kwaba mnandi. Ngike ngaba yi-marketing supervisor yeWalt-Disney international ngizinze eChiswick, eLondon.”
Ngisayi Ngane amakha amnandi ayevusa ilukuluku lami lokuthi ngabe wayezihlanganisa kanjani izinongo ukuze kuphekwe ukudla okumnandi, okumangalisayo.” – UNkk Farzana Alvarado.
Ngesikhathi ese-Europe, uthando lwakhe lokudla kwakhula ngokuya ehambela leli zwekazi. Waqaphela ukuthi konke ukudla kunendaba okuyixoxayo futhi konke “ukudla kwesintu kunomlando, indlela okuhlanganiswa ngayo nendlela okuhlanganisa ngayo abantu.”
Ngo-2014, uNkk Alvarado washintsha umsebenzi wafundela ukupheka e-HTA school of Culinary Arts. “Ngabaqwaqwada emakhanda engangifunda nabo futhi ngathola izindondo ezimbili okushintshwana ngazo. Ngisebenze njengethwasa e-Hilton Hotel e-Sandton lapho ngawina khona umklomelo i-HTA Culinary Mastermind Award ngo-2017.”
Akagcinanga lapho, uqhubekile wazakhela igama ezinkundleni zokuxhumana lapho ebizwa khona ngoChef Zana, wabelana ngamaresiphi nabamlandelayo. Ezinye zezinto azizuzile ukuphekela izinkulungwane zabalandeli eSandton Fanfest ngesikhathi kunemidlalo yeNdebe yoMhlaba eMzansi ngo-2010. Ungomunye wabasunguli beFeista Latina festival, athi iyona kuphela eqhakambisa amasiko nokudla kwamaLatino eNingizimu Afrika.
Uyakuqaphela ukudla okunempilo futhi ufuna ukukhuthaza abanye abazali ukuthi bakubhekisise ukudla abakunika izingane zabo.
Uthando analo ngemboni yezindaba lumholele ekutheni abe ngumethuli wezindaba nohlelo lwasekuseni oyitoho emsakazweni iRadio Al-Ansaar, isiteshi somphakathi wamaSulumane esisebenzela eThekwini naseMgungundlovu, eKZN.
Ngo2010 wajoyina iMetro FM ethula izindaba izinyanga ezimbalwa.Umpheki Alvarado ungunkosikazi nomama wezingane ezimbili. Uyakuthanda ukuvakashela izindawo kanti useke wavakashela amadolobha angu-69. Ngo-2001 washicilela incwadi yezinkondlo ebizwa ngokuthi i-Shadows.
Uthi ugqugquzeleke ukuthi abhale incwadi emva kokuba sengozini yemoto aphaphama esibhedlela elimele kakhulu. Kuthe esalashwa waqala ukubhala izinkondlo enzela ukupholisa ikhanda ukuze amelane nesimo sakhe. “Uhambo lwami alubanga lula, kodwa luwubufakazi bokuthi umuntu uyakwazi ukumelana nanoma yini futhi ngithemba ukuthi kuzogqugquzela abanye ukuthi bangalilahli ithemba.”
Uwumpheki okhonze ukudla okunempilo futhi ufuna ukukhuthaza abanye omama ukuthi bondle izingane zabo ukudla okunempilo. Mayelana nomsebenzi wakhe ubheke ngabomvu ukwenza lokho akuthanda kakhulu, ukupheka, ukubhaka nokuthi mhlawumbe agcine evule indawo yokuhlala. Unethemba lokuthi ngelinye ilanga uzoshiyela izingane zakhe ifa elihle. “Engifuna ukubashiya nakho nje ukuthi babe ngabantu abalungile futhi abanomusa kwabanye abantu emhlabeni.”
